Bun ki skul, nang hiar arsut ka pule puthi, ong u ma Comingone Ymbon

Syllad | The Rising MeghalayaNovember 17, 2024

“Watla ka jylla Meghalaya, ka dei kawei napdeng ki Jylla ka thain shatei Lammihngi kaba don bun eh ki skul, hynrei kyrdan bad ka standard pule pthi kala nang hiar sha tbian. Lehse kane ka jinghiar kyrdan ka lah ban dei ka daw ka jingbun eh ki skul,” la ong u ma Comingone Ymbon.

U Ma Cominone Ymbon u Myntri hapoh ka sorkar MDA kaba ialam da ka NPP, ula ong shuh shuh ba “Ka pule puthi hapoh ka Jylla Meghalaya ka phiel naduh kaba sdang hynrei ka sorkar kaba mynta kala pyrshang ban pynbeit iaki jingbakla baroh ba la mad bad leh naduh ki por mynshwa.”

Haba kren shuh shuh haka jingrakhe dap 100 snem ka Shangpung Govt. Upper School haka 16 tarik Naiwieng ula kren bynniaw ba haki 50 snem kiba la leit ym don sorkar ba phai khmat na ka bynta ban pynbha pynmiat iaki iingskul bad bynrap wat la kane ka sorkar MDA hapoh ka jingialam ka NPP ka treishitom ban pynbiang iaki jingdonkam, hynrei ym don ba iaroh iaka jinglehbha bad jingpyrshang jong ka sorkar kaba mynta ban wanrah iaki jingkylla hapoh ka tnad pule puthi. Ula buh jingkylli ka pyrthei aiu kum kane ka bym don shuh ka jingiaburom bad sngewnguh mar kylliang?

Haba pynshlur iaki khynnah skul ban long kiba trei shitom, u Ma Coming ula ong “Ngi im ha kane ka juk, ka juk jong ka jingiakhun ha kaba ka jingnang ka jingstad ha kut ki liang ka la kiew lut bad ka kam sorkar kam lah ban pynim ia uwei pa uwei, kumta ka la dei ka por ban duriap namar ka ktien ruh ka ong tang uba duriap hi ba lah ban im.”

U Myntri ula kyntu ruh iaki kmie ki kpa ban ailad iaki khun ba kin jied ia kaei kaba ki kwah ban long haka jingim ka jong ki.

U Ma Coming ula iaroh ruh iaka jingiatylli jong ki nongshong shnong ka Shangpung hynrei wat la katta ula kyntu pat ia kiba nongiashim bynta ban rah iaka khubor sha ki iing ki sem ki jong ki ban pynneh pynsah ia kane ka jinglong namar ka jingiapait iapra kan pynduh jingmyntoi iaka shnong ka thaw.

Ula kitbok kitwriang ruh ba kane ka jingdap 100 snem jong ka skul kan nangbteng ban ai ka jingshakri kaba janai tam khamtam ia kane ka thain khnang ba ki khynnah kane ka skul kin ioh iaka jingshemphang bad ka jingnang jingstad kaba paka.