Bun kiba kylla khlem ïing khlem sem ba syllad ka ‘eriong ia ka thain Jirang, pan jingiarap kyrkieh u MLA

Syllad | The Rising MeghalayaApril 2, 2024

Kiba bun tylli ki longïing lonsem ha ki shnong kiba hap ha ka thain Jirang Constituency, Ri Bhoi District ki la shah ktah jur bad don ruh kiba la kylla khlem ïing khlem sem na ka jingwan lynshop ka ‘erïong bajur kaba la jia ha ka miet sngi U Blei ba la lah.

Ha kaba iadei bad kane ka jingjia na ka liang u MLA ka thain u Bah Sosthenes Sohtun ula buh ka jingkyrpad ia ka sorkar jylla ba kan pynsted ia ki lad jingiarap na ka bynta kito ki longïing kiba la shah ktah.

Lah ban kdew ba kiba bun ki shnong kiba hap ha ka Jirang C&RD Block ki la shah ktah jur na ka jingshah syllad ha ka ‘erïong kaba jur kaba la pynjulor ia bun phew tylli ki  ïing ki sem bad ruh ia ki jingthung jingtep jong kiba bun tylli ki shong ha ka thaiñ Jirang.

Haba la iakren bad ki nongpathai khubor, u MLA ka Jirang u  pynpaw  ka jingsngewkhia kaba jur halor katei ka jingjia ba sngewsih kaba la wanrah ka jingjulor ia ki ïing ki sem bad ruh ki jingthung jingtep kaba la long ka jingduhnong kaba khraw ia kito ki lanot ba la shah ktah bad kaba kham sngewkhia ka long ba la don ruh ki longïing kiba la shah ktah jur ha kaba ki la hap ban riehtngen shipor ha ki ïing Dorbar bad ki skul namar ka jingduh noh ia ki iing ki sem ha kane ka ‘eriong.

U la iathuh ruh da ki phew tylli ki shnong kiba la shah ktah hapoh ka Jirang Constituency kiba kynthup kum ka shnong Pamumsylliang, Umshalini, Rani, Gonpati, Jalpaham, Matang, Jirang, Umsohpai bad kiwei kiwei.

Nalor kata u la ong ruh ba nalor ki ïing ki sem  kane ka eriong ka la pynjulor ruh ia  ki diengkwai, ki diengjri (rubber) bad kiwei kiwei ki jingthung jingtep kiba la ktah shisha ia kiba bun bah ki longiing longsem

Kum u Nongmihkhmat paidbah u la iathuh ruh naduh ka sngi UBlei tang mar ia ioh jingtip u la dep ban kren naduh u BDO ka Jirang Block C&RD Block kiba la phah ia ki briew ban leit jurip ryngkat bad ma u kum u Ophisar bad ruh u la kren sha u Deputy Commissioner ka Ri Bhoi ba un shim khia khamtam ban pynpoi ia ki lad jingiarap sha kaba kham kloi sha kito ki lanot kiba la shah ktah jur.

Shuh shuh, u la ong ruh namar ka jingsngewkhia kaba jur halor kane ka jingjia ba sngewsih ia kiba bun ki longing longsem, kum u nongmihkhmat paidbah u la pyntip ruh sha u Symbud Myntri Rangbah ka jylla, u Bah Prestone Tynsong da kaba kyntu ia ka sorkar jylla bakan pynsted ban pynpoi ia ki lad jingiarap sha kito ki longing ba shah ktah jur bad ruh ban pyrkhat kyrpang ba kan nym ktah ia kito ki longïing kiba la duh ia ki iing ki sem ha kane ka jingjia.