Bunkam ka sorkar MDA ban wanrah kam pynroi ha ka jaka ban sngap ia ki jingkynnoh ki liang pyrshah: Dy.CM

Syllad | The Rising MeghalayaJanuary 18, 2025

U Symbud Myntri Rangbah uba khmih ia ka Tnad kam  Pohiing u Bah Prestone Tynsong ha ka 17 tarik Kyllalyngkot u la ong ba ka sorkar MDA ba la ialam da ka NPP ka bunkam ha ki jingpyrshang ban wanrah shuh shuh ia ki kam pynroi na ka bynta ki jingmyntoi jong u paidbah bad kam don por ban pynlut kai ia ka por ban iakren halor ki party liang pyrshah bad ia ki jingkynnoh ba khlem nongrim jong ki.

Haba jubab ia ka jingkylli halor ka jingpynkhreh ka NPP ia ka elekshon sha ki Autonomous District Douncil (ADC) ha Rilum Khasi bad Jaintia, u Bah Tynsong u la ong ba um iohi satia ba kan don kano kano ka jingktah halor ki jingkynnoh khlem nongrim jong ki party liang pyrshah ia ka party ha kane ka elekshon ka ban wan.

Ha ka jingsngew ka jong u, kane kam dei shuh kaei kaei kaba thymmai ba ki party sain pyrthei kiba don ha ka liang pyrshah ba kin pynmih ia ki jingkynnoh kiba ha rukom pyrshah ia ka party NPP kaba ialam ia ka sorkar.

“Kumta ruh la ka dei ka VPP ne kiwei pat ki party, ka dei ka kamram jong ki ban ong ia kata. Wat ma nga lada nga don ha ka liang pyrshah, nga hap ban ong ba kane ka sorkar ka dei kaba bamsap nalor kiwei pat ki jingkynnoh lem kumta ka kyrteng jong phi kan shu jah rngai. Phi sngewthuh ia kata. Kumta ngan ym pynlut por halor kane namar  namar ngan ong ha phi ba kaba bha eh ka long ban peit ha ka 24 tarik u Rymphang kaba dei ka sngi niew vote bad hangne phi sa sngewthuh,” ong u Bah Prestone haba kren sha ki lad pathai khubor.

Haba kylli, une u Myntri u la ong, “Kaei kata ka mat pyrshah sorkar kaba phi iakren? Nga dang shu jer kyrteng ia ki project ba la pyntreikam da mano. T.5000 klur tam ngam tharai ba kan dei ka kamkai bad lada phi iakren ia ka T.15000 klur ruh jong ka surok Express Corridor ruh phi lah ban pyrkhat ba ka Meghalaya kaba dei ka jylla kaba rit hynrei ngi la ioh haduh katne ki project bad ki skhim. Balei ngi ioh? Ka dei namar ba ka sorkar ka dei kaba treikam bha. Ngi la lah ban pynkohnguh ia ka sorkar India ba ngi la lah ban ioh ia kine ki kam pynroi.

“Ngim pynlut kai ia ka por hangne ban ong ba une u long kumta kumne, ngim don por ban ong ia kata. Ngi don por tang ban leit sha Delhi bad ka bowl ryngkat ki kti kyrpad ba sngewbha ban ai ia ngi la kalong kumno kumno ruh. Lada ngi dei ban nguh ia ka khlieh jong ngi ruh ngi hap ban leh na ka bynta jongno.? Na ka bynta ka jingmyntoi jong ki paidbah ka jylla. Na kata ka daw ngam don por ban iakren halor kiwei pat ki party lane bad no bad no ruh hynrei ngi la duh thiah duh dem ba kumno ngin lah ban wanrah kham bun ki project bad ki skhim sha ka jylla jong ngi,” u la bynrap.

Ha kaba iadei bd ka rai jogn ki katto katne ki MDC ka NPP ban iakhun kum ki kyrtong shimet, u Bah Tynsong u la ong, “Ngam don ei ei ban ong halor kata. Kane ka dei ka synshar paidbah.Phi don ia ka hok ban leh ia kata. Phi lah ban iakhun na ka BJP lane na kino kino ki party lane phi kwah ban iakhun kum ki kyrtong shimet namar ka riti synshar jong ka Ri ka shah ban leh ia kata, kumta ruh ngam don ei ei ban ong, ka shong ha ki.”