Bym ioh bai musur khyndew khang trei ker sainar shiah sa Hingaria

Syllad | The Rising MeghalayaAugust 24, 2019

KHLIEHRIAT: Ka Khasi Student Union (KSU) Hingaria Unit ryngkat ka ka jingiadonlang ki trai jaka haka sngi Saitjaiñ kila leit khang iaka jingpyntrei ker sainar shiah ha ka shnong Hingaria namar ka jingbym ïoh bai musur khyndew.

Kumban shu pynkynmaw ba ha ka 17 tarik une u bnai ruh ka KSU Narpuh bad Huroi ryngkat bad ki trai shnong kila khang ïaka jingker sainar shiah (Indo-Bangladesh Border Fencing) ha Huroi namar ba ha kane ka shnong ruh ki trai jaka kim shym la ïoh ïaka bai lutksan.

Ia katei ka jingker sainar la khang halor ka jing kuman ka sorkar bad ka company ban siew bai khyndew sha ki briew kiba shah ktah ki jaka puta jong ki bad ki jaka rep wat hadien ba ka company NBCC kaba pyntrei ïa kane ka jingker sainar shiah kala ïaid shakhmat ban trei.

Ka KSU kala kynnoh ba naduh ba sdang ka jingpyntrei haduh mynta ki briew kim pat ïoh lut ïaka bai musur khyndew bad dei halor kane ka nongrim kila shim ïaka rai pynsangeh ïaka jingtrei sa ha kane ka shnong tad haduh ba kila ïoh lut ïaka bai lutksan.

U Deputy Commissioner ka East Jaintia Hills District ula kular ban shimkhia ban phah siew dep lut ïaka bai musur khyndew, hynrei haduh mynta kim pat ïoh satia katba ka jingpyntrei ka la iaid shait shait shakhmat.

Ki bor shnong kila leit buh iaki kyrteng ki briew bad ki jingthung jingtep kiba la shah ktah hynrei kam don kano kano ka dak ka shin ne phah jingtip sha ka shnong ne ki trai jaka.

U President KSU Hingaria Unit u SS Lamin ula byrthen ba ka KSU kam ailad ia kino kino ki bor sorkar ne company ban leh bor bad thombor ïaki trai jaka kiba shah ktah ki jaka rep jaka riang bad lada ki trai jaka kim ïoh ka bai lutksan kin nym ai lad ban ïaid ka jingker sainar shiah ha katei ka thaiñ.

U General Secretary ka shnong Hingaria u Garnes Talang, ula ong ka shnong kam don jingpyrshah ïaka jingker sainar shiah, hynrei ka long pat kaba sngewsih ba ki bor ba dei peit kim patiaw eiei ban siew ïaka bai lutksan sha ki trai jaka ba shah ktah ha kane ka jingker sainar shiah.

Ula ong shuh shuh ba kaba lyngngoh kalong ba ka NBCC kaba pyntrei ïa ka jingker sainar shiah kala shim jaka jubor da ki phew meter na ka bala mang bad ai u paidbah bad kane kala ktah jur ïaki trai jaka nalor ba kim ïoh ïaka bai lutksan.