Bym ioh C&RD Block maham ka NBAJAC ban ‘boycott’ election 2023

Syllad | The Rising MeghalayaDecember 17, 2021

Ka Narpuh Border area Joint Action Committee (NBAJAC) ka synjuk jong ki Waheh Shnong, Secretary Shnong kiba don hapoh ka Elaka Narpuh bad ki Shnong kiba don markhap bad ka thain Narpuh ka dawa na ka sorkar Meghalaya Democratic Alliance (MDA) ban ai Community & Rural Development Block thymmai ia ka Thain Narpuh khnang ba ki Shnong kiba don shajan khappud Bangladesh bad khappud Assam kin suk ia ki ha kaba leit donkam sha ki ophis jong ka Block.

Kumba long mynta ka sngi la pynkynriah bad plie mawnongrim ia ka C&RD Block Khliehriat sha Wapung da u Conrad Sangma bad kane ka jingdon jong ka C&RD Block shaduh sha Wapung mynta kan buh jingeh ia ki paitbah baroh jong ka thain Narpuh mynta, namar ba jan baroh ki schemes jong ka Sorkar khamtam ia ki schemes MNREGA hap ban leit lyngba ki block ban ioh ia ki bad Kane kan buh jingeh bad pynshitom ia ki Shnong kum ka Shnong Malidor, Ratacherra,Dona Umbluh, Huroi, Hingaria nalor kiwei kiwei.

Ka jingjngai mynta kan long haduh 90 kilometres tang ban leit sha ka ophis block tang na bynta ban leit pyndep ia ki kam kiba iadei bad ka Block bad kumta ka NBAJAC ka kyrpad jur ia ka sorkar MDA ban ai da ka block thymmai ha thain Narpuh da kaba buh ia ka Headquarter ha Lumshnong khnang ban pynsuk ia ki paitbah jong ngi bad ban pyniajan ia ki ophis sorkar khamtam sha ki thain Nongkyndong.

Kumba pynkynmaw ba ha u snem 2018 ka NBAJAC ka lah ia kynduh ia u Conrad Sangma halor kane ka kam na bynta ban ai block thymmai ia ka thain Narpuh, bad ha u snem 2019 ka NBAJAC ka lah kynduh ruh ia u C&RD Block minister Sniawbhalang Dhar bad ia u Kyrmen Shylla Minister Social Welfare ha u snem 2020 na bynta ban iarap kren ha ka cabinet meeting ban pynkha block thymmai ia ka Narpuh.

Ka Thain Narpuh hi ka long kaba sahdien tam bad kaba shah niewbein tam ha baroh ki liang naduh ki por jong ka Sorkar Congress bad mynta ka la shah ieh bein bad niewbein ruh ha ka Sorkar MDA hapoh ka jingialam u Conrad Sangma.

Ka NBAJAC ka la maham tyngeh ba lada ka sorkar MDA kam lah ban ai C&RD Block thymmai ia ka Narpuh kan boycott shi syndon ia ka election 2023 bad ka ai deadline ruh ban ai Shwa ka budget Session jong ka Assembly 2022 lym kumta ka NBAJAC kan pyllong da ki jingiakhih kiba jur nangne shakhmat khnang ban ioh ia ka Block thymmai.

Kane ka long ka kyrwoh ba la phah da u Secretary ka NBAJAC Ma Daiapherbha Lamare.