Bym ioh kit dewbilat, clinker ki trok trai jylla iakhih biang ka JHTOA

Syllad | The Rising MeghalayaSeptember 24, 2024

Ka seng ki trai trok hapoh ka lama Jaintia Hills Truck Owner Association (JHTOA) kila mih biang sha surok ban pynlong iaka jingiakhih pyrshah kaba khlem buh por hadien ba ki karkhana dewbilat kim shym la pyntreikam iaka jingkut ai bhah kit dewbilat bad clinker (dew sain dewbilat) sha ki trok trai jylla haka 23 tarik Nailur.

Ha ka sngi sdang jong ka jingiakhih haka 23 tarik Nailur, ka JHTOA kala pynphai haduh palat 100 tylli ki trok ki dewbilat, clinker jong ki karkhana dewbilat na Rilum Jaintia kila shah pynphai. Kiba bun ki trok ba shah pynphai ki dei jong ka company Star Cement.

Haka jingiakren bad u President ka JHTOA u Ma Biangshwa Shylla ula ong baroh ki karkhana pynmih dewbilat kiba don haka thaiñ East Jaintia Hills District khamtam ka karkhana Star Cement kim shym la bud ryntih iaka jingiakut ban kit mar kata ka dewbilat bad clinker.

“Ka JHTOA kam banse ban shim ia kane ka rai ban pynlong da ka jingiakhih namar ka jingbym khein snep kine ki karkhana dewbilat bad pynduh lad iaki trai trok trai ri trai muluk ban ioh kamai naka kit ka bah,” la ong une u nongialam ka JHTOA.

Shuh shuh u Ma Shylla ula iathuh ba la dep ban iakut ban pyllait iaki trok jong ka JHTOA, 21 tylli haka shisngi haka aiom lyiur bad 40 tylli shisngi haka aiom tlang, hynrei kine ki karkhana na ka por shaka por ki iaid lait ia kane ka jingiakut kaba la dep ban iasaiñ iasoi hakhmat ki bor pyniaid district jong ka East Jaintia Hills.

Ka jingdawa jong ka JHTOA kamdei kaba heh, hynrei la dawa tang kat ban im bad ban pyndap pynbiang iaka jingdonkam jong ki khun ki kti bad ka iing ka sem bad kumba long mynta khamtam une u bnai ka kamai kajih ka hiar namar ka jingleh bym suidniew kine ki karkhana, la ong u Ma Shylla.