Bym ioh tulop 8 bnai lynter ai mukotduma ki nonghikai SSA ïaka sorkar

Syllad | The Rising MeghalayaFebruary 1, 2020

SHILLONG: Ka synjuk jong ki nonghikai SSA hapoh ka Jylla, ka Meghalaya SSA School Association (MSSASA) kala mudui da ka mukotduma hapoh Ingbishar Meghalaya High Court ha kaba ïadei bad ka jingpynslem ban siew ïa ka Arrear sha ki nonghikai SSA kaba haduh phra bnai kynthih, kata naduh 1 tarik Naitung, 2016 haduh ka 28 tarik Rymphang, 2017 jong u snem 2016-17.

Ia katei ka mukotduma ka MSSASA kala  mudui ha ka 28 tarik, Kyllalyngkot mynta u snem pyrshah ia ka Sorkar India bad ia ka Sorkar Meghalaya katkum ka Article 226 jong ka Riti Synshar ka Ri India.

Ha ka mukotduma, ka MSSASA, ka la kdew ba ïa ka tulop jong ki nonghikai SSA ha ka jylla Meghalaya la mang bad pynkiew da ka ophis jong u State Mission Director SEMAM-SSA & Commissioner & Secretary ka tnat Pule Puthi ka Sorkar Meghalaya lyngba ka jingbthah kaba la pynmih ha ka 31 tarik, Risaw, 2016.

Ka MSSASA ka la kdew ruh ha kane ka mukotduma ba ka Sorkar Jylla kam shym la pyllait ïa ka Arrear sha ki nonghikai SSA kaba dei ban siew naduh ka 1 tarik, Naitung, 2016 haduh ka 28 tarik, Rymphang, 2017 jong u snem 2016-17 wat hadien ba ka Seng ka la ai bun tylli ki jingthoh sha ki bor badei peit jong ka tnat Pule Puthi bad sha u Myntri ka tnat Pule Puthi bad kumjuh ruh wat sha u Myntri Rangbah da kaba kyrpad ban pyllait noh ïa ka  Arrear jong ki nonghikai skul SSA.

Shuh shuh, ka Seng ka la kdew hadien ka jing phah ia bun tylli ki jingthoh bad ka jingiakynduh bad ka Sorkar na ka por sha ka por ka shu kut tang ha ka jingiakren ki dkhot ka seng ki la phah ruh da ka Legal Notice ïa ka Sorkar Jylla ha ka 20 tarik, Rymphang, 2019 ban dawa ba dei ban pyllait noh mardor ïa ka  Arrear jong u snem 2016-17 ha kaba na ka liang jong ka Tnat Pule Puthi ruh ka la kubur ba kane ka jingdawa jong ka Seng ban pyllait noh ia ka Arrear ka long kaba shongnia.

Ka jingbym pyllait ïa ka  Arrear jong ki nonghikai SSA da ka Sorkar Jylla wat hadien 4 snem ba la pynkiew ia ka tulop ka dei ka jingpynduh noh ia ka hok  ki nonghikai katkum ba la kdew ha ka Article 14, 16, bad 21 jong ka Riti Synshar ka Ri India bad kiwei kiwei ki hok katkum ka ain.

Lah ban kdew hangne, ba ki nonghikai SSA hapoh ka Jylla ha ki snem bala dep ki la pynlong bun tylli ki program jingiakhih ban dawa ban pyllait ia ka tulop Arrear na ka Sorkar Jylla.