Bym khot paidbah iaka tender ai wai Beat Office ka JHADC kyntait u MDC ka VPP ban weng ia ka resolution, hynrei liem noh ha ka jingia vote

Syllad | The Rising MeghalayaMarch 29, 2025

Da ka jingbitar halor ka jingbym khot tender paidbah ka Executive Committee jong ka Jaintia Hills Autonomous District Council (JHADC) na ka bynta ban ai wai ne lilam ia ki Beat Office jong ka tnat Forest u MDC jong ka Voice of the People Party (VPP) na ka Jowai North Constituency bad u Chief Executive Member barim jong ka JHADC u Ma A Andrew Shullai u la kyntait ban weng ia ka resolution jong u, u Chairman jong ka JHADC u Dr Sankey Shangpung u la hap ban pynlong ia ka jing ia vote halor kane ka resolution bad khatduh khatwai namar ka jingbun paid ki liang synshar ka resolution ka la liem noh.

U Ma Shullai u la ther tyngeh ia ka Executive Committee jong ka JHADC na bynta ka jinglilam ia ki Beat Office jong ka tnat Forest sha ki riew shimet kiba lah dain kuna khlem da sngewthuh ne tip pura ia ki Forest Act bad rules ne ki ain ki kanun ban iada ia ka khlaw btab bad ki kyndon treikam jong ki bad kane ka jingleh jong kitei ki riew shimet ka lah pynhiar kyrdan ia ka bor ka iktiar bad ka jingthmu jong ka tnat Forest jong ka JHADC.

U la ong shuh shuh ba kane ka jingleh jong ka tnat Forest ka la plie lad plie lynti na bynta ka jingkhaii tuh jong ki mar ki mata kiba mih na ki khlaw  btab bad ka lah nang pynjulor ia ka mei ka mariang haba wanrah ia ka resolution pyrshah ia ka rukom treikam jong ka tnat Forest jong ka JHADC ha ka Dorbar Mang Tyngka kaba la long ha ka 28 tarik u bnai Lber 2025.

U MDC jong ka Jowai North u la ai jingmut ba ka iingdorbar ka dei ban pynrem ia ka jingtrei thurmur jong ka tnat Forest bad ka dawa ia ka jingtohkit kaba bniah halor jingpheil ka rukom treikam jong katei ka tnat bad ka jingdon kti lang jong ka tnat ha ki kam beain. U la dawa ruh ba ka jinglilam jong ki Beat Office jong ka tnat Forest dei ban pynduh pyndam noh shi syndon bad dei ban khmih sani ki kyndon lilam jong ki Beat House sha ki riewshimet.

U Ma Andrew u la dawa ba ka Council ka dei ban thung noh ia ka kynhun laitluid ne ka independent committee ban tohkit halor jingtih marpoh khyndew beain, ka jingpomdieng bad ka jingpyndonkam beain ia ki mar ki mata kiba na khlaw na btab hapoh u pud u ang jong ka JHADC.

U Chief Executive Member barim jong ka JHADC u la ong ba ka tnat Forest ka dei ban shim iaki sienjam ban pynthikna ban pyntreikam iaka Forest Act bad ki ain ki kanun kiba iahap ban iada ka mei ka mariang bad dei ban pynshitom ia ki ophisar ki bym trei hok ia la ka kamram.

U Ma Andrew u la dawa ba ka Council ka dei ban shim ia ki lad ki lynti kiba donkam haba ki paidbah ki lah ban pynpoi ia ki jingujor jong ki haba ki shem kano kano ka jingiaid lait jong ka tnat Forest khnang ban wanrah ia ka rukom treikam kaba khuid kaba suba.

Haba jubab ia katei ka resolution, u Chief Executive Member jong ka JHADC u Ma Thombor Shiwat u la ong ba ka rukom treikam jong ki ophisar bad ki nongtrei jong ka tnat Forest ki long ki bym I hun bad ki bym biang satia bad bun bah ki jingduna wat la ka Executive Committee ka la pyrshang bunsien ban pynbeit ia ki, hynrei kim shym la beit satia. U la ong shuh shuh ba ki Beat Office jong ka tnat Forest ha ka por ba pyniaid dalade ka tnat Forest ki kamai tang 10.55 lakh tyngka shi snem bad kane ka paw shai kdar ba kam biang ka rukom treikam jong ka tnat Forest.

U la ong kumta ka Executive Committee ka la shim ia ka rai ban ai wai noh ne lilam ia kitei ki beat office sha ki riew shimet ban peit halor ka jingmih na ki bad kaba phylla ka long ki Beat Office hadien bala pyniaid da ki riew shimet ki la kamai haduh 50 lakh tyngka shi snem.

Halor katei ka jubab jong u Ma Shiwat, u Ma Andrew, u MDC ka VPP na Shiliang Myntang u Ma Daeimi Liam bad ka MDC ka VPP na Narpuh ka Kong D Tongper ki la dawa ban pyndam ia ka jingai wai ne jinglilam kaba rim bad khot paidbah ia ki tender ban ai wai ne lilam ia kitei beat office.

Na ka liang u MDC ka Congress na Saphai Sahshniang Rikut N Parien halor kane ka kynnoh kam thurmur ka jingtreikam ka tnad kam khlaw bad ka jinglum pisa beain, ula dawa ha iing dorbar ban pyndam iaka jingai wai.

Na ka liang jong u Chairman jong ka JHADC u la kylli noh ia u Ma Andrew hato yn weng noh ia katei ka resolution halor ki jingpynshai na ka Executive Committee hynrei u Ma Andrew u la pynpaw ba ym treh ban weng ia katei ka resolution bad kumta u Chairman u hap ban pynlong jing ia vote bad kiba pyrshah ia katei ka resolution ki la jop na ka daw ka jingbunpaid.

Shuwa kane ar tylli kiwei pat ki resolution kiba la wanrah u ma Andrew dei halor ka jingpyniaid iaka iew ki hat hapoh u pud ang ka JHADC bad ka jingpyllait pathar iaki trading license sha ki nongkhaii bar jylla kaba la ktah kylla iaki nongkhaii trai jylla. Baroh ar tylli kine ki mat iakren hadien bala iatai, une u MDC ka VPP ula weng iaka resolution.