Bym kyndang ka sorkar ia ki bar jylla, shna ïing ka KSU ia ki Khasi ha Maxwelton Estate

Syllad | The Rising MeghalayaMarch 1, 2024

“Ka Khasi Students’ Union (KSU) Laban Circle haka 29 tarik u Rymphang, ka la leit ban shna syndon da ki iing na ka bynta ban ai sha ki Khasi ki bym don iing don sem ha Maxwellton Estate ka jaka kaba heh kumba 9 akar, kata ban pynpaw pyrshah ia ka jingleh bym suitniew jong ka sorkar ban kyndang ia ki bar jylla kiba shong ba sah beain ha kane ka jaka sorkar.

Na ka liang ka KSU ka la leit ruh ban wah da ki banar ha shilynter ka surok Maxwellton Estate ha kaba la sakhi ia kawei na ki jingthoh kaba ong “Ka KSU kan ym ailad ia ka Maxwelton Estate ban kylla long ka Them Mator 2.0”.

Kane ka sienjam ba la shim da ka seng KSU ka la wan long ruh hadien ba ka la ai por ia ka sorkar jylla 15 sngi ba ka dei ban kyndang noh ia ki bar jylla ki ba wan shong beain ha kane ka jaka hynrei ia kaba kam shym la leh eiei.

Haba kren sha ki lad pathai khubor na ka liang u President KSU Laban Circle u samla Rueben Najair u la ong ba ka seng ka la dawa na ka sorkar ba ban kyndang noh ia kine ki bar jylla hynrei kim shym la leh eiei kat haduh mynta.

Nalor kata u la ong ruh, “Haba ki bar jylla ki ioh ban shong beain ha kane ka jaka, ngi ruh ngin shong beain lang. Na ka liang ka seng ka khot bad wer ruh ia ki Khasi baroh ki ba sah ha Shillong ban wan shong wan sha ha kane ka jaka.

Ka KSU kala kynnoh ba ki don shibun bah ki iing ki sme kiba la shu shna beain ha kane ka Estate, kata ia kiba la shna khlem ka jingioh jingbit na ka Dorbar Shnong, Kenches Trace, Oxford Rilbong lane kino kino ki bor ba dei khmih.

Shuh shuh na ka liang ka Seng ka la maham ruh ia ki bor district ba kim dei satia ban pynpra ia kine ki iing kiba ka seng kala pynshna na ka bynta ki Khasi, bad lada ki leh kumta ka Seng ruh kan pynpra lut ia baroh ki iing ki sem kiba don ha kane ka jaka.

Hadien ba ka Khasi Students’ Union (KSU) Laban Circle  ka la leit  ban shna syndon da ki iing ha ka jaka sorkar kaba don ha Maxwellton Estate, na ka liang ka Deputy Commissioner ka East Khasi Hills, ka Kong R M Kurbah ha kane hi ka sngi ka la khot iakren ia ki nongialam ka Seng  halor kane ka phang.

Hadien ba la mih na ka kamra treikam jong ka DC, na liang u president ka KSU Laban Circle u samla Rueben Najiar u la ong ba ka jingiakren bad ka DC ka long kaba seisoh namar na ka liang ka DC ka kular ban thoh sha ki bor jong ka Municipal ban pynsangeh noh ia ki briew kiba ri jing ri bad kala bthah ruh iaka Municipal ban phah iaka notice bad bud iaki kyndon.

Ha kaba iadei pat bad ka jingdawa ban kyndang ia ki briew kiba shong ba sah beain ha kane ka jaka na ka DC ka la pyntip ba katei ka jaka ka don ha ka iingkashari bad ka shem shitom ban weng ia ki.

Hynrei na ka liang ka ka Seng ka la ong  namar ba ki don ki kyndon kiba ka sorkar ka dei ban leh, kumta ka donkam ban pynkloi ban weng noh ban tem iaka jingbuhai shnong ki bar jylla.

Shuh shuh u la ong ba lada dang iai pynslem ha kaba iadei bad kane ka bynta kan buh jingeh hi ia ka Sorkar, bad na ka liang ka KSU kan dang iai bteng ban shna ia ki iing ki sem bad ban pynbun ia ki trai muluk ba kin shong leit sah ha katei ka jaka.

Ka KSU kala kyntu ruh iaka DC ban pynthikna ban leh iaka survey ha kane ka jaka, nakaliang ka DC kala ong ba kane ka jaka ka hap haka tnad Revenue bad kadei kane ka tnad ban leh bad ai iaka kaiphot sha ka. Kumta ka KSU kala ong ba ha ki sngi ban wan kan ai iaka shithi ban pynthkna ban survey ithuh ia ki briew kiba la sah slem bad kiba khyndiat por.