Bym kyrshan ïa u Thombor Shiwat shah pynshitom u rangbah ha Nongdhar

Syllad | The Rising MeghalayaApril 19, 2019

JOWAI: Tang namar bym kyrshan ïa u Ma Thombor Shiwat, u kyrtong NPP bad u CEM JHADC mynta, ka Dorbar Shnong Nongdhar kala rai pynshitom ïa uwei u rangbah kaba ïaryngkat bad ka jingshah tait shnong.

Hynrei ka jingshlur jong u rangbah ban pyrshah ïaka rai jong ka dorbar shnong Nongdhar kila poi sha ka jingiasuk hadien ba kila shah khot hajir ha Nartiang Police Station haka 18 atrik une u bnai.

Une u Rangbah uba shah pynshitom haka Dorbar Shnong Nongdhar u dei u San Jone Laloo bad ula ong “Kane ka jingpynshitom ïa nga kala jia tang hadien ka elekshon MDC jong ka JHADC namar ba nga kyrshan ïa u kyrtong ka Congress, u Jweller Synrem bad ngam shym la kyrshan ïa u kyrtong monlang ka shnong Nongdhar, u kyrtong ka NPP u ma Thombor Shiwat na Nartiang Umladang.”

“Tang hadien ka jingniew vote ha u bnai Lber 4 tarik, ka Dorbar Shnong Nongdhar kala pynshitom ïa nga da kaba shaiñ kuna T.10,000/- bad kynnoh ba nga ïaid pyrshah ïaka shnong bad leh pyrshah shnong bad lada ngam lah ban siew yn tait shnong,” la ong u ma San Jone Laloo.

Ki Pulit jong ka Nartiang Police Station hadien ba kila ïoh ka jingbthah na ki bor ba halor kane ka rai ka dorbar shnong Nongdhar, kala khot hajir ïaki arliang mamla ha thanad.

U Waheh Shnong ka Nongdhar u Dolanki Shiwat bad u Chairman Shnong Marli Nongpluh kila kyntait mardor ïaka kynnoh rai tait shnong bad kila ong ba kadei ka kam shnong. Katba u San Jone pat ula ong ba ka dorbar shnong kala rai ban tait shnong, hynrei haba la poi ha thanad kila iasuk bad ki pulit kila ieh haka dorbar shnong ban khot ïaka jingialang dorbar ban pynbeit ïa kane ka kam bad kam don kano kano ka jingthoh na ki pulit ban mana ïaka bor shnong ban lehki kam pyrshah ïa ka aiñ.