Bym lar kam ka sorkar Meghalaya hap rai ai kylliang ka shnong Lapangap bad ka Assam ban ioh surok

Syllad | The Rising MeghalayaJanuary 13, 2021

Wat la ka shnong Lapangap ka pyrshah iaka jingsiang surok ka sorkar Assam, hynrei haka 12 tarik une u bnai kala rai rangbah ban shah iaka sorkar Assam ban trei iaka surok lada kam pynthud pat iaka jingshna surok ka sorkar Meghalaya na Khanduli sha Lapangap, kaba long kum ka jingia ai kylliang ban wanrah iaka roi ka par ha ki shnong khappud.

Kane ka rai kala mih naka shnong Lapangap hadien ka jingmih paidbah ban pyrshah iaka jingsiang surok ka Assam na Tahpat, Langkeroi, Lapangap kaba ka sorkar Assam kala trei naduh u bnai July jong u snem 2019.

Ha kane ka jingshim rai ka dorbar shnong Lapangap la iadonlang ki nongialam bad dkhot jong ki sengbhalang ka KSU, FKJGP bad ka JSM kiba la hiar sha Lapangap ban pyrshah iaka jingshna surok ka Assam na Tahpat, Langkeroi, Lapangap.

Ka sorkar Assam naduh u snem 2019 kala iaid beit shakhmat ban trei ia kane ka surok kaba la pynlong iaki nongshong shnong ban pyrshah jur bad kynnoh ba ka Assam kala kyntur ïaki pud u sam bad ki jaka rep jong ki.

Kane kala poi sha ki skhor jong ki bor synshar jong ki ar district, West Jaintia Hills bad ka West Karbi Anglong, hynrei kam shym la poi shaei shaei.

Kumta ka bor shnong Lapangap ruh kala iai pyrshah, hynrei kala rai da kawei pat ka sur haka 12 tarik une u bnai ha kaba ki nongïalam jong ka Dorbar Shnong Lapangap ki la pynpaw ba ki kloi ban ailad ban iaid jingshna surok ka Assam na Tahpat, Assam sha Khanduli, Meghalaya lyngba ka Shnong Lapangap lada ka sorkar Assam kam pynthud pat ïa ka jingshna ïa ka surok na Khanduli sha Lapangap lyngba ka Shnong Langkeroi.

Ïa katei ka jingdawa la pynpaw da ki nongïalam jong ka Dorbar Shnong Lapangap ha ka jingsynran lang jong ka Border Magistrate jong ka West Jaintia Hills District ka Kong B Blah bad u DSP u Bah M Marngar bad ki nongïalam jong ki Lai tylli ki sengbhalang ka KSU, ka FKJGP bad ka JSM ha khmat u Border Magistrate jong ka West Karbi Anglong District u Mongve Enghi bad u DSP u Nayan Moni Barman.

Ka dorbar shnong Lapangap kala dawa ban pynsangeh shwa ïa ka jingshna ïa katei ka surok na Tahpat shaduh Khanduli lyngba ka Shnong Lapangap tad haduh ba ki bor district jong kine ki ar tylli ki district bad sorkar kin ia soi iaka soskular ba kim dei ban pynthud iaka jingshna surok na Khanduli shaduh Lapangap.

Ka sorkar Assam marsien bna ia kane ka jingrai mih paidbah kala pynsangeh iaka jingtrei surok naduh ka 11 tarik une u bnai.

Ki nongïalam jong ka Dorbar Shnong Lapangap kiba kynthup ïa u Waheh Shnong u Bah Deimonmi Lyngdoh, u Bah Pyrkhat Pyrphet kumjuh ki nongïalam jong ki Lai ki sengbhalang kiba la shah khot sngewbha haka Dorbar Shnong Lapangap ïa u President ka KSU Jaintia Hills District Unit u Ohibait Dkhar, u Chief Organizing Secretary ka FKJGP Jaintia Hills Zone u DS War bad kiwei kiwei de ki la ïalam ïa ki paidbah jong ka Shnong Lapangap bad ki dkhot jong ki sengbhalang ym duna ïa ka arspah ngut naduh ka Shnong Lapangap shaduh ka surok kaba dang shna thymmai da ka sorkar Assam hapoh u pud u sam jong ka Shnong Lapangap haduh ka Jingkieng halor ka Wah Umtyra. 

Katei ka jingïaid paidbah sha katei ka jaka ka long ban pynpaw ïa ka jingpyrshah jong ki halor ka jingshna jubor ka sorkar Assam ïa ka surok hapoh u pud u sam jong ka Shnong Lapangap.

Ka jingjngai jong katei ka surok naduh Tahpat kaba don ha West Karbi Anglong District shaduh Khanduli lyngba ka Shnong Lapangap ka long kaba jngai haduh 11.40 kilometers bad kumba 5 kilometer ka hap hapoh u pud u sam jong ka Shnong Lapangap.

Halor katei ka jingdawa jong ki na ka liang jong u Border Magistrate jong ka West Karbi Anglong ula kular ban pynsngew sha ki bor kiba halor jong u bad ki DC jong kitei ki artylli ki District kata ka West Karbi Anglong bad ki West Jaintia Hills District kin sa shim ïa ka rai halor kane kam.

Ki nongïalam jong ka Shnong Lapangap bad ki sengbhalang ki la pdiang ïa katei ka jingkular ba ki la ïa rai ban leit phai noh sha Lapangap da ka lynti kaba jai jai bad ka jingkyrmen ba ka jingdawa jong ki kan sa urlong.

Shwa ban pynlong ïa katei ka jingpyrshah la pynlong ïa ka jingïalang paidbah ha ka phyllaw jong ka Community Hall jong ka Shnong Lapangap haba la ïoh jingkren na Waheh Shnong u Bah Deimonmi Lyngdoh, u Bah Pyrkhat Pyrphet bad na ki nongïalam jong ki Lai sengbhlang.

Ki nongkren baroh ki la pynrem ïa ka sorkar Meghalaya kaba ym shym la shim khia ban pynbeit noh ïa u pud u sam ba ka sorkar Assam bad ki la pynrem ïa ka jinglong arsap jong ka sorkar Assam kaba la khang ïa ka jingmarmot surok na Lapangap sha Khanduli da ka Dorbar Shnong Lapangap ha u snem 2019 katba ka sorkar Assam pat da ka surok thymmai ka shna syndon hapoh u pud u sam jong ka Shnong Lapangap.