Bym leh ei ei ka sorkar, leit kyndang ka HYC ia ki 80 tylli ki iing ki sem ba shna beain ha Lum Survey
Ka Hynniewtrep Youth Council (HYC) ha ka step 23 tarik Jymmang ka la leit ban kyndang naphang ia ki 80 tylli ki iing ki sem jong ki bar Jylla kiba shna beain ha ka jaka jong ka Defence Estate ha Lum Survey, Shillong kaba la kylla long ruh kum jaka slum.
Kane ka jingleit kyndang jong ka HYC ka la wan long ruh hadien ka jingkut noh ka artaiew ba ka HYC ka la ai por hadien ka jingleit jurip ba la pynlong da ki bor pyniaid district ha ryngkat ki nongialam bad ki dkhot jong ka HYC.
![](https://www.syllad.com/wp-content/uploads/2024/09/JIT-Vacancy-823x1024.avif)
Ha kane ka jingleit kyndang la sakhi ia ki nongialam bad kiba bun bah ki dkhot jong ka HYC kiba la leit tur paidbah sha katei ka jaka ban kyndang naphang ia baroh ki iing ki sem kiba la shna beain ha kane ka jaka ha kaba ki bor pulit ki la hap ban shu peit tang ban khanglad ioh mih kano kano ka huri hura.
Haba kren sha ki lad pathai khubor, u president HYC u Bah Roykupar Synrem u la ong, “Ngi la ap khubor na u Deputy Commissioner ha kaba iadei bad ka jingdawa ban kyndang noh ia kine ki briew kiba shong ba sah beain ha kane ka jaka ha Lum Survey hapoh ka ar taiew, hynrei kim shym la ioh jingtip ei ei ruh kat haduh kane ka sngi. U la ong ba ki la ioh jingtip ruh ba kito ki briew kiba donkti ha ki kam khaii drok kiba la mih noh na kane ka jaka ki la wanphai biang sha kane ka jaka. Kumta halor kane ka HYC kam banse ban shim hi ia kane ka sienjam ban kyndang ia kine ki iing kiba shna beain ha kane ka jaka.”
Nalor kata u la ong ruh ba ki la pyntip sha kine ki briew kiba shong beain ha kane ka jaka ba kin lum lut ia baroh ki tiar ki tar bad ban mih noh na kane ka jaka shwa ba ka Seng kan kyndang ia ki iing ki sem ki jong ki. Ha kane ka jingleit kyndang u la ong ba haduh 50 percent na kumba 80-90 tylli ki iing ki dei kiba la khang tala ha ka por ba ki leit ban kyndang.
Haba kylli, u president ka Seng u la ong, “Kalong kaba sngew bynniaw shibun ba ki bor ba dei khmih kim shym la leh ei ei bad ngi la hap ban shim ia ka jingkitkhlieh halor kane ka bynta kaba ha ka jingshisha ka dei ka kamram jong ki bor pyniaid district bad kiwei pat ki bor ba dei khmih ban kyndang ne ban pynshitom ia kine ki briew kiba shong beain ha kane ka jaka. Ngi pynrem jur ia kane ka jingleh namar la jan shi bnai naduh ba ngi la dawa ia kane bad artaiew naduh ba ngi la pynlong ryngkat lang ia ka jingleit jurip sha katei ka jaka.”
Kumjuh u la ong ruh ba na ka liang u DC ruh u tip shai ba kine ki briew kiba don ha kane ka jaka kidei kiba shong ba sah beain, bad ngi tip ruh ba ka Tnat pulit ka don ia ki tnat syntiat bad ka don ia ki jingtip ba ki la pyndonkam ia kane ka jaka na ka bynta ki kam khaii drok, hynrei kim shym la leh ei ei. Kumta ngim banse ban shim ia kane ka sienjam.
Shuh shuh u president u la ong ba ka seng HYC kan ym shaniah ha ka sorkar ne kino kino ki bor ba dei khmih lada ka sngew ba ka long pyrshah ia ka bha ka miat jong ki nongshong shnong hynrei kan shim hi ia ka ain hala ki jong ki kti.
Leave a Reply