Bym patiaw ki karkhana dewbilat ban ai bai kit thymmai, byrthen ka JHTOA ban khang kit dewbilat sa iaki kali Assam

Syllad | The Rising MeghalayaDecember 13, 2021

Wat hadien ba ka Jaintia Hills Truck Owners’ Association (JHTOA) kala pynlong iaka jingiakhih kaba khlem buh por ban sangeh kit dewbilat naduh 6 tarik une u bnai, ka synjuk ki karkhana dewbilat kila leh bymsuidniew ia kane ka jingiakhih bad ban pyntreikam iaka bai kit bai bah thymmai kaba la pynbna da ka sorkar jylla lyngba ka tnad Transport.

Ka JHTOA mynta ka sngi kala lum jingialang kyrkieh bad shim iaka rai babn pynjur iaka jingiakhih da kaba khang ruh iaki kali kit dewbilat clinker sha Assam ba iaid sha ka thain Kalain bad Silchar. Katba iaki kali kit dewbilat hapoh Jylla la shah ban kit dewbilat, tangba ki hap ban ai jingthoh sha ki nongialam ka JHTOA.

Ka JHTOA kala rai ba ban shah ba kit dewbilat ha Jylla khnang ba kan nym ktah iaki trai ri trai muluk kiba pyndonkam dewbilat ban trei ban ktah.

Haka sngi Thohdieng ka taiew kaba la dep ruh kala don ka jingialang hapdeng ki arliang mamla ka JHTOA bad ka JHCMA. Ia kane ka jingialang la khot da u incharge DC ka East Jaintia Hills, hynrei kam shym la poi shaei shaei.

Kumban shu pynkynmaw ka sorkar kala pynmih iaka jingpynbna naduh u Kyllalyngkot 2020 bad la pynkylla biang ha u bnai Nailur 2020 ban pynthymmai ïaka dor bai kit mar ki trok kata T.7 haduh T.11 shi kilometre shi ton ha ki surok rong, T.8 haduh T. 12 shi ton shi kilometre haki surok maw bad T. 10 haduh T. 12 shi ton shi kilometre ha ki surok khyndew.

Ka JHTOA kala mynjur bad pdiang iaka dor T.7/- shi metric ton shi kilometre hadien ka jingiakren kaba bun bunsien hapdeng ki karkhana bad ka sorkar, pynban kane ka jingpynbna ka sorkar kam shym la treikam kaba la pynbor iaki trai trok ban mih sha surok ban iakhih.