Bym thikna ka rukom ïoh tulop khot jingïalang ki nonghikai SSA East Khasi Hills

Syllad | The Rising MeghalayaDecember 11, 2019

SHILLONG: Ka Meghalaya SSA School Association (MSSASA) Sengkmie kan pynlong ia ka jingialang jong ki nonghikai SSA kiba hap hapoh ka East Khasi Hills District ha ka 14 tarik mynta u bnai hapoh Riatsamthiah Community Hall, Shillong kaba don marjan bad ka Christian Academy Higher Secondary School ha ka por 11 baje mynstep ban ïakren sani halor ka jingbym thikna ka rukom ïoh tulop ki nonghikai SSA ha East Khasi Hills District bad kiwei kiwei ki jingeh ki nonghikai.

Ha u kyrwoh bala phah da u Bah F Wanniang, Bah S Khriam, Bah JJ Lyngkhoi bad Bah JL khongsngi kiba la jied da ka MSSASA Sengkmie ban peit shipor ia ka MSSASA East Khasi Hills District Unit kila pyntip ba kane jingialang (General Meeting) la khot katkum ka rai jong ka General Executive Meeting jong ka MSSASA Sengkmie kaba la long ha ka 8 tarik u Naiwieng mynta u snem.

Ha katei ka jingialang yn iadonlang ki nongialam jong ka Sengkmie naduh u President Bah Aristotle C Rymbai, General Secretary Bah Ralbingland L Nonglait bad kiwei ki dkhot ka Sengkmie ban pynsngew bad pynshai sha ki nonghikai SSA ka East Khasi Hills District ia ki rai jong ka General Executive Meeting nalor kiwei de ki kam kiba iadei bad ka jingiakynduh jingeh jong ki nonghikai SSA hapoh East Khasi Hills District  khamtam ka jingbym ioh tulop biang por ki nonghikai SSA wat hadien bala pyllait ia ka fund da ka office jong u State Project Director, SEMAM-SSA sha ka na office jong ka DMC bad SDSEO.

Ha kane ka jingialang yn iakren ruh iaka jubab u Deputy Secretary, Department of School Education and Literacy, MHRD, Govt of India bad ka office jong ka State Education Mission Authority Meghalaya, Shillong (SEMAM) ha ka 14 tarik u Naiwieng kaba iadei bad ka jingpan jingshai halor ki kam kiba iadei bad ka jingthungkam ia ki 5814 ngut ki nonghikai SSA Lower Primary bad 6727 ngut ki nonghikai SSA Upper Primary hapoh ka scheme ‘Samagra Shiksha’, kaba ha kine ki khyndiat bnai ba la dep la buh ia ki nonghikai SSA  ha ka jingklulmar jingmut hadien ba la paw ha ka Project Approval Board (PAB) 2019-20 na ka bynta ka Jylla Meghalaya ba ki nonghikai SSA Lower Primary kidei  contractual bad  ki nonghikai SSA Upper Primary kidei regular. Yn pynsngew ruh ia ka kaiphod jong ka  jingiakynduh ki nongialam ka MSSASA Sengkmie ïa u Lahkmen Rymbui Myntri ka tnat pule puthi ha ka 26 tarik u Naiwieng ban buddien bad iakren ia katei ka mat nalor kiwei de ki mat jingdawa jong ka Seng kiba iadei bad ki nonghikai SSA.

La kyntu ïa baroh Ki nonghikai SSA jong ka East Khasi Hills District ban pyllait por khnang bad wan sha katei ka jingialang ban ioh ia ka jingshai kaba bniah.