Bynniaw jur ka KSU bym don nonghikai Chemistry ha Sohkha Goverment Higher Secondary School

Syllad | The Rising MeghalayaOctober 6, 2023

Hadien ka jingud jingnam jong ki khynnah skul bad ki nongshong shnong ka thaiñ halor ka jingbym don nonghikai ha ka sobjek Chemistry hapoh Sohkha Goverment Higher Secondary School, na ka ling ka Khasi Students’ Union (KSU), War Jaintia Circle haka sngi Thohdieng ka la pynlong ka jingleit jurip ia katei ka skul sorkar bad lap ia ka jingshisha baroh.

Ha kane ka jingleit jurip ba la ïalam ba la ialam da u general secretary ka seng u Lurman Talang bad kiwei ki nongialam napoh West Jaintia Hills District Unit ki la leit ban jurip ia katei ka skul ha kaba ki la lap ia ka jingshisha baroh.

Ha ka jingtohkit bniah ka KSU ka lap ba ka daw baroh ka dei namar ka jingpynkylla jong ka sorkar halor ki rukom treikam jong ki nonghikai ha kaba kin hap ban pyndep ia ka B.Ed, bad ba u nonghikai uba shim ia katei ka sobjek u la hap ban leit pyndep shwa ia kane ka bynta ba la buh da ka sorkar.

Hynrei, ka KSU kala pynpaw ka jinglyngngoh ba na ka liang ka sorkar kam shym la thung bujli da kiwei pat ha katei ka jaka bathylli wat hadien ba la dep khot na ka bynta ban pyndep ia katei ka kam kaba lait.

Ka KSU ka pynpaw ruh ka jinglyngngoh namar kane ka skul naduh u bnai Lber ba la dep kam don satia ia u nonghikai ha ka sobjek Chemistry bad kaba la wanrah jingeh shibun ia ki khynnah pule jong kane ka skul.

Kumta ka KSU ka pynpaw ka jingbitar ia kane ka jingleh sting jong ka sorkar ha kaba iadei bad ka pule puthi namar kan ktah jur ia ki khynnah pule khamtam mynta ka la jan dei sa ka por ba kin thoh ia ka pre selection bad ka selection bad ruh ban pynkhreh ia kiwei kiwei pat ki eksam.

Na ka liang ka KSU lyngba une u kyrwoh ka la ong ba kan dang iai buddien halor kane ka bynta bad lada ka sorkar kam lah ban pyndep iala ka kamram ka seng kan sa leh ia kaba donkam.

Shuh shuh ka KSU ka buh ruh ka jingkylli ia ka sorkar ba lada kine ki khynnah skul kim lah ban ioh ia ka jinghikai kaba biang kan jia aiu ia ki khynnah skul bapli. Halor kane ka KSU ka la ong ba ka sorkar ka dei ban shim ia ka jingkitkhlieh bad ban wad mardor ia ki lad ki lynti khnang ba kin khynnah pule kin ioh ia ka jinghikai kaba thikna shwa ba kin pynkhreh ban thoh ia ki eksamin jong ki.