Bynñiaw ka AJCVA ba ïoh iaid laitlan ki kali motor, ym treikam ka odd even number

Syllad | The Rising MeghalayaMay 19, 2021

Ka All Jaintia Commercial Vehicle Association (AJCVA) kala pynpaw ïaka jingbyñniaw kaba khraw ba ioh laitlan ki kali motor wat hadien bala pyrkhing iaka rukom iaid ki kali da ka odd even number ha West Jaintia Hills District.

“Bun ki kali watla ym dei ka sngi ba kin iaid, hynrei ki ioh ban iaid laitlan khlem don kano kano ka jingpynshitom ia ki bad ki ioh ban kamai katba mon,” la ong u Paila Kordor Lyngkot president AJCVA.

U Paila ula ong baka sorkar kala pyntreikam da ka odd even number iaki kali paidbah hynrei ym don ba bud ryntih iaki hukum ka bor synshar district.

Ula buh jingkylli ruh kumno kine ki kali ki ioh ban iaid wat la kam dei ka sngi ba kin ioh mih. Mano ba ai bor ia ki bad hato ka hukum sorkar ka treikam tang ia luk u lak?

Ka aiñ ka dei ban long salonsar bad ula ong ruh ba bun ki briew kiba pyndonkam bakla wat iaki car pass khamtam ki nongtrei sorkar bad iaid sahuh ha surok.

“Ngi la iatreilang bad ka sorkar bad bor synshar district haba ka pynjari da ka lockdown ban tehlakam iaka jingpur ka khlam wat la ngi ioh ka kamai kyndiat kynsoit namar ba ngi sngewkhia. Ngi hun ban buh kali ha iing ban sangeh kamai ban tem iaka jingpur ka khlam,” la ong u Paila bad ula ong “Kam myntoi ka kamai kaba shisngi lada ngi duh ia kiba ieit kiba thoin jong ngi naka jingiabit khlam.”

Ula wer ia baroh ban tynrong halade iaka jingkitkhlieh bad sumar ialade bad ban bud ryngkhi iaki adong adit ka khlam COVID-19 bad banjur ia baroh kiba don kali ban kohnguh iaki hukum sorkar khnang ban pyndkut iaka kynjri jingpur ka khlam.