Bynniaw ka DS Mawryngkneng ba sahteng ka jingpyntrei ia ka Pomlahier Greater Water Supply Scheme

Syllad | The Rising MeghalayaJune 16, 2024

Ka Dorbar Shnong Mawryngkneng ka pynpaw ka jingsngewkhia kaba jur halor ka jingsahteng ka jingpyntrei ia ka Pomlahier Greater Water Supply Scheme kaba hap hapoh ka Jal Jeevan Mission (JJM).

Na ka liang u Bah Peter Lawai Sordar Shnong haba kren sha ki lad pathai khubor ha ka 15 tarik mynta u bnai, u la ong ba ia ka treatment plant la lah ban pyndep bad ka jingbuh por ban pyndep ia ka project baroh kawei ha ka jingshisha ka long naduh u bnai Rymphang 2024.

Halor kane ka DS Mawryngkneng ka kyntu jur ia u Myntri ka Tnat PHE kumjuh ia ki heh kane ka Tnat ba kin sdang bad ban pyndep noh mardor ia kane ka kam hapoh jong une u bnai Naitung u ban wan.

U Bah Peter u la ong ba ia kane ka scheme la mang ha u snem 2023 ha ka jinglut kaba haduh palat 48 klur. U la ong ruh ba ka project sam um lyngba ka JJM ka kdup haduh 3000 tylli ki longiing hapoh ka shnong Mawryngkneng.

“Ki la sdang ia ka kam ha u snem 2023, hynrei Nga bynniaw shibun ban ong ba mynta kane ka prject kala sangeh bad sahteng noh. Ia kane ka treatment plant la lah ban pyndep katkum ka work order ba la ai da ka Tnat PHE, bad ha ka jingshisha la buh por khatduh ban pyndep ia ka project baroh kawei naduh kaba kut jong u bnai Rymphang 2024,” u la ong.

Nalor kata u Sordar Shnong u la ong ruh ba ki don katto katne ki kontraktor ki bym pat shym la sdang ia ka kam ha kaba iadei bad  ka jingpynpoi ia ki pipe um sha ki iingbriew. Haba pyrshang ban tohkit na ka Tnat PHE, ka Dorbar Shnong ka la ong ba la ioh jingtip ba ki don katto katne ki kontraktor ki bym don mon ban pyntrei ia ka ka kam.

“Lada ki kontraktor kim don ia ka mon ban pyntrei ia ka kam sngewbha ban pynkut noh ia ka tender bad ailad ia kiwei pat ki kontraktor ba kin sdang noh ia ka kam,” ong u Sordar Shnong. Haba kylli, u la ong ba kim don jingtip balei ba kane ka jingpyntrei ka la sahteng noh.

Shuh shuh u Bah Peter u la ong ruh kumba ka long mynta ka jingpynpoi um hapoh ka shnong Mawryngkneng kam long satia kaba biang hapoh ki skul, hospital, ophis sorkar, block office bad sha ki longiing longsem.