Bynniaw ka ECC iaka jingshah kynriah kam u DC East Jaintia Hills

Syllad | The Rising MeghalayaNovember 23, 2021

Ka Environment Co-Ordination Committee (ECC), Elaka Sutnga kala pynpaw iaka jingbynñiaw halor ka jingshah pynkynriah kam u Deputy Commissioner, East Jaintia Hills Bah Ethelbert Kharmalki bad un shimti noh iaka kam Secretary Mining & Geology jong ka sorkar Jylla.

“Ngi sngew bynniaw halor ka jingpynkynriah kam jong ka Sorkar MDA ia u DC, namar u dang don tang 14 tylli ki bnai. Ha ka jingshisha ka samoi treikam jong u ka dei ban long um duna iaka 3 snem, hynrei ka shu pynkut ia u kynsan kynsan tang haki 14 tylli ki bnai, bym pat dei por.  Haka juh ka por ngi kitbok kitrwiang ia i ba in nang lah ban iai shakri khambha ia u paidbah ha kano kano ka jaka trei. Ngi buh ruh haka jingduwai ba U Blei un ai ha i iaka met ba koit ba khiah bad un nang theh ki jingkyrkhu ia ka iing ka sem jong I baroh kawei,” la ong ka ECC.

Ka ECC bad ki khun jong ka Elaka Sutnga, ka pynkynmaw biang iaka sorkar lyngba u Chief Minister ban bat iaka kular kumba u la dep ong da ka Sorkar ba kan nym ai shuh iaki kot ki sla sha ki karkhana coke. “Ngi kyrpad iaka Sorkar lyngba ka Expert Committee ban pyndep kloi ia ka Inspection, khnang ba u paidbah jong ka Elaka Sutnga bad ka District hi baroh kawei ban lait naka jingshahktah naki pumpum ba jakhlia kiba mih na ki Coke Factories bad teh lakam ia kito ki coke factories ki ba trei be ain haduh kine ki sngi,” la ong ka ECC.