Bynniaw ka FKJGP ba sniew tasam ka surok bah NH 06 dawa na ka sorkar ban shna mardor

Syllad | The Rising MeghalayaSeptember 9, 2022

Ka Federation of Khasi Jaintia & Garo People (FKJGP) East Jaintia Hills District Khliehriat kala pynpaw iaka jingbynniaw kaba khraw halor ka jingsniew tasam ka surok National Highway-06.

Ka FKJGP haka jingïalam u president u MC Suting ryngkat ki dkhot haka sngi Palei ki la leit aiti ïaka dorkhat ha u Abhilash Baranwal, Deputy Commissioner, East Jaintia Hills District Khliehriat ban kyrpad ïa u ban shimkhia ban moramot bad pynbha ïaki jingkieng (Bridge) ba don ha lynter ka surok bah naduh Lumshnong ter ter shaduh Sonapur bad ka jingjot ka surok ka long kaba sha palat kaba ka dur ka dar ka surok kam iahap kyrdan shuh kum ka surok bah.

Ka FKJGP kala ong ki jingkieng kila shong synjor bad ymlah ban tip ha kano kano ka por kine ki jingkieng kin dkut noh bad kane kan buh jingeh ïaka leit ka wan jong ki paidbah napoh ka District bad kiwei ki jylla kiba iaid lyngba kabe ka surok.

Ka FKJGP kala kyntu iaka sorkar MDA ba kan shimkhia ban shna mardor iaka surok bad dawa pynshitom ïaka NHAI, kaba pyntrei iaka surok halor ka jingleh torti bad khlem moramot ïa kane ka surok bah National Highway ha kaba kumba long mynta tang kum ki surok shnong.

Ka FKJGP ka la ïathuh ba haka jingkren jong ka bad u Deputy Commissioner ula ïathuh ba ula pyrshang bunsien ban ïakren bad ka NHAI hynrei na ka liang NHAI kam kheiñ snep ïaka jingkren jong u DC.

Shuh shuh ka la ïathuh ba kum u khlieh ka District ma u ruh u kwah ban ïohi ïaka roi ka par hapoh ka District bad ula kular ban shimkhia bad ban ïakren biang bad ka NHAI bad lada ka NHAI kam shimkhia na ka liang jong u DC un leh ïa kaba donkam.