Bynñiaw ka JSU ba duh iaki ready-made Corona Care Centre ha Jaintia

Syllad | The Rising MeghalayaJune 3, 2021

Hadien ba ka Jaintia ka khlem paw kyrteng ban buh iaki 100 jingthiah ne ki ïing shipor bala tip kum ki PreFab/ readymade Corona Care Centre ka Jaintia Student Union (JSU) ka pynpaw ka jingsngew diaw bad kyntu ïaka sorkar ban buh iaki kum kine ki Corona Care Centre ha rilum Jaintia.

U President JSU, u Jesrom Shylla bad u Assistance General Secretary u Neilkee R Mukhim ki la buh jingkylli ïa ki 7ngut ki MLA ka Rilum Jaintia halor ka jingduh ka bhah kyrpang ka Jaiñtia Hills haka 100 jingthiah Prefab corona care centre bad la mang tang iaka Shillong bad ka Tura.

Ka JSU ka la pynkynmaw ba ka rilum Jaintia ka shah leh klet ha baroh kiliang wat la kadei kawei ka thaiñ kaba la shah ktah bha ha u ne u khniang Covid-19.

Ka JSU ka ong ba donkam bha ban ïoh kum kine ki 100 jingthiah prefab corona care centre khnang ban lah ban tehlakam ïaka jingpur ka khlam.

Ka JSU ka ai khublei ïa ki dong ki shnong ki ba don ha sor Jowai ki ba la buh ïa ki Ïing Set Slung Shnong ne Community Isolation Centre ban iarap iaki nongshong shnong ban ioh shong pynkyrpang ialade kito kiba iabit ia une khniang ha kine ki ïing ban lait na ka jingïabit ne saphriang sha kiwei ha ki longïing jong ki.

Ka seng ka kyntu ruh ïa ka sorkar Jylla ba kan plie shuh ïa ki Corona Care Centre hapoh ka jingpeit ka sokar hapoh rilum Jaintia namar ba dang duna bha ka jingdon jong kine ki Centre hapoh Jaintia.

Ka JSU ka kyrpad jur ruh ïa ki MLA ban tuklar ia kane ka kam bad buddien ban pynïoh khnang ïa kane ka Hospital 100 jingthiah prefab corona care centre kaba dei hok ban ïoh ha rilum Jaiñtia khnang ban iarap ïa kito ki briew kiba ïoh ïa u ne u khniang bad ban pynkhreh ruh na ka bynta ka wave kaba lai jong une u khlam Covid 19.