Bynniaw ka JSU ia ka jingkren u Dy. CM halor ka jingthmu wanrah lynti rel, dawa pyntreikam ia ka ILP

Syllad | The Rising MeghalayaJuly 21, 2023

Ka Seng Jaintia Students’ Union (JSU) ka la pynpaw ka jingbym sngew iahap ha kaba iadei bad ka jingkren jong u Dy. CM ka jylla u Sniawbhalang Dhar halor ka mat kaba iadei bad ka jingthmu ban wanrah lynti rel hapoh Jaintia Hills.

Ka Seng ka la kam ba ki don tang khyndiat eh ki briew, kata khamtam ki nongkhaii na Jaintia Hills kiba kwah ia ka jingwan ka lynti rel hapoh ka thain.Watla katta ka Seng ka la iai ban ba kan ym don jingmut satia ban wanrah ia ka lynti rel katba ym pat lah ban pyntreikam ia ka Inner Line Permit (ILP) ha ka jylla namar lyngba kane yn lah ban khanglad ia ka jingwan rung laitluid jong ki briew kiba na shabar hapoh kane ka jylla.

Ka Seng ka la ong ruh ba dei tang ka ILP kaba lah ban iada ia ki hok bad ia ka kolshor jong ki trai shnong, namar khlem ka ILP ka jingioh lad jong ki briew kiba na bar lyngba ka jingpyniasoh ia ka lynti rel kan ktah jur ia ka imlang ka sahlang bad ia ka ioh ka kot jong ki trai shnong hapoh Jaintia Hills.

Kawei pat ka mat ba la rah da ka Seng ka long halor ka jingiapher ki dor ki mur jong ki mar ki mata hapdeng ka Assam kaba la pyniasoh lypa ia ki lynti rel bad ka Meghalaya ha kaba ki dor ki mur hapoh Assam ki kham rem bun shah haba ia nujor bad ka Meghalaya.Kumta ruh kane ka kdew shai ba ka jingthmu ban wanrah ia ka lynti rel kan ym long kaba donkam.

Nalor kata kane ka seng samla pule ka la ong ruh ba ka jingwanrah ia ka lynti rel ka lah ban kham pynsuk ha kaba iadei bad ka jingioh ia ki mar ki mata, hynrei kan nangkyntiew pat ha kaba iadei bad ka jingwan rung jong ki briew kiba na shabar bad kane kan ktah jur ia ka imlang ka sahlang, ka ioh ka kot bad ia ka jinglong jingman ha ka jylla hi baroh kawei.

Kumta ruh ka seng ka kyntu ia baroh ki kynhun kiba ia don bynta ha ki jingiakren ba kin shim ia ki sienjam da kaba pynshong nongrim halor kine ki jingsngewkhia jong ki paid nongshong shnong jong ka thain bad ka jylla.