Bynniaw u Chairman ka Lajong FC bym don player Khasi ha kynhun ialehkai ka India

Syllad | The Rising MeghalayaMarch 23, 2025

 U Chairman uba dei ruh u trai jong ka Shillong Lajong Football Club u Bah Larsing M Sawyan u la pynpaw ka jingsngew bynniaw namar ha kane ka kynhun ialehkai phutbol jong ka ri kiba la don ha kane ka nongbah Shillong kum shi bynta ka jingpynkhreh ba kan iakhun ia ka AFC Cup Qualifier 2027 pyrshah ia ka Bangladesh ka ban long ha ka 25 tarik Lber ha JN Stadium, Polo ki la don ym duna ia ka 7-8 ngut ki player na Manipur, kato katne ngut na Mizoram hynrei ym shym la don ki rang ialehkai na ka jylla Meghalaya.

Ia kane u Bah Larsing u la pynpaw haba ha ka jingialang kitbok kitrwiang ia ka skul Mynken Christian Higher Secondary School, kaba la long 22 tarik Lber ha hotel centre point.

Kumta ruh haba iohi ia kum kane ka jingjia na ka liang u bah Larsing u ban jur ba ka por ka la dei ban ia shim lem ia ka jingkut jingmut ba kongsan ban ia phaikhmat bad ruh ban trei shitom ban pynkhlain ia ka jingialehkai phutbol naduh naduh na tynrai ne grassroot, kata ka jingshim khia naduh ka sorkar, ka MFA ka SSA, ki synjuk ialehkai Phutbol ha ki district bad ki kynhun ialehkai kiba don hangne hapoh ka jylla ban iatreilang kawei ban lah ban kynjoh sha katta ka thong ban saindur ia ki rangialehkai kiban ioh ban phong ia ka jersey rong blu jong ka ri.

U la ong ruh ba katno kan long ka jingsngew sarong ban shem bad iohi ba ki samla lajong kin ioh ban mih madan lem bad ka kynhun ka ri haba don ki jingiakhun ha la iing bad kan dei shisha kata ka sngi jong ka jingkmen bad sngewsarong ia ka jylla hi baroh kawei.

Yn ia tynjuh ki player ka Myngken HSS bad ki khynnah ki Club ba pawnam ka France ha Paris

U Bah Larsing kum u trai jong ka Shillong Lajong u dap da ka jingkmen bad sngew sarong ba man la uwei pa uwei u samla khasi ba la dep ban ioh mihkhmat ia ka ri, kidei kiba ka jingim ialehkai ka jong ki la sdang ruh na ka Lajong.

Ha kine ki 20 snem kiba la dep, kum ka Club ka sngew sarong ba na ka  shlem ka jong ka ba kan sei ia ki rang kynsai ba nylla kum u bah Rokuc Lamare, Aiborlang Khongjee bad bah Eugeneson Lyngdoh.

Hynrei kum uwei a ki trai jong ka Club ba la wanrah bha ia ka nam bad burom ia kane ka jylla, u bah Larsing u la ieng ban pynkynmaw ba ha ka jingialehkai kaba la dep pyrshah ia ka Maldives, u sngew sarong ba ha kane ka kynhun ki rang ialehkai ba mynta jong ka India, ka don ia kiwei pat ki samla ialehkai  kiba  ka jigim ka jong ki kadei kaba ki la ialehkai shipor na ka Club bad kine ki long u Sana Khongsam, u Mahesh Singh bad u Vishal Kaith, ha kaba kine ki laingut ki samla ialehkai kidei kiba la don bynta ha kata ka thup ka Goal 18 programe jong ka Club.