Bynniaw u Ma Rikut bym ai bynta ia ka jingshad jingrwai tynrai ha ka tamasa Cherry Blossom

Syllad | The Rising MeghalayaMarch 28, 2025

U MDC jong ka Seng Congress na Saphai Sahsniang Constituency u Ma Rikut Parien u la pynpaw ia ka jingbynniaw jong u halor ka jingbym ai ia ki jingrwai jingshad tynrai ha ki tamasa Cherry Blossom bad Kupli Fiesta haba u la dawa ruh ia ka Executive Committee jong ka JHADC ban seng noh ia ka skul ban ai jinghikai ha ka jingshad tynrai ka jingrwai tynrai bad rukom tem ia ki jingtem tynrai khnang ban im bad neh ka kolshor jong ka jaidbynriew Pnar.

U Ma Rikut u la pynpaw ia kane ka jingsngewbynniaw haba shim bynta ha jingkren kyllum ne ka general discussion ia ka budget ha ka Dorbar Mang Tyngka jong ka JHADC ha ka 27 tarik u bnai Lber, mynta u snem.

Haba kren shuh shuh, u MDC jong ka Saphai Sahsniang u la ong ba ki nongrep jong ngi ki trei shitom ban pynmih ia ki mar rep jong ki kum ki jhur ki jhep, ki sying bad ki synsar hynrei kaba sngewsih pat ka long ba ia kitei baroh ki mar rep la oh dor da ki Marwari ha ka Jylla Meghalaya. Kumta u la pynpaw ia ka jingdonkam ban buh noh ia ka wholesale market ne ka iewdielang ha Rilum Jaintia khnang ban tehlakam ia ka jingoh dor ki Marwari.

Kular u CEM ka JHADC ban khynra trading laisen bad labour laisen ha ki sngi ban wan

U MDC jong ka VPP na Mihmyntdu Nangbah Constituency u Ma G Susngi u la pynpaw ia ka jingsngewkhia halor ka jingthut bad jingbymshai jong ki speaker hapoh ka iing Dorbar Thawain bad u la ong shuh shuh ba kan long kaba sngewsih ba ki briew kin ioh sngew kham shai ia ka jingpah ki sim ban ia ka jingiakren jong ki. U la bynniaw ruh halor jingjulor jong ki shuki ki MDC bad u la kyntu ruh ba dei ban buh da ka dur kaba heh jong u Rev J J M Nichols Roys uba long u kpa jong ka Sixth Schedule. U la dawa ruh ba dei ban shna maramot noh ia ka surok hapoh ka Iawthymmei jong ka Council kaba don ha Ladthadlaboh, Jowai bad ban pynkhuid noh ia u nuit bala lang ha Iawthymmei.

Na ka liang jong u MDC ka VPP na Mukhla Ummulong u Ma N Lamare u la pynpaw ia ka jingbymsngewhun ia ka budget speech jong u Chief Executive Member namar kam shym la kdew kino ki polsi treikam kumno ban pynmih pisa khnang ban lah siew tulop ia ki nongtrei bad MDC jong ka JHADC man u bnai.

Kiwei kiwei kiba la iashim bynta ha ka jingiakren kyllum lang ki kynthup ia lai ngut ki Chief Executive Member barim kata u MDC ka VPP na Jowai North u ma A Andrew Shullai, u MDC ka Congress na Amwi Khliehtyrshi u Ma M B Rymbai bad u MDC shimet na Jowai South u ma Moonlight Pariat.