Bynniaw u MLA ka VPP ba kylla jaka thad jain ki jingker ha Khyndailad

Syllad | The Rising MeghalayaAugust 30, 2024

U MLA ka liang pyrshah Voice of the People Party (VPP) na North Shillong u Bah Adelbert Nongrum haka 30 tarik Nailar u la pynpaw ka jingsngewkhia halor ka jingpynkylla jaka thad jain ia ki jingker railing ha ki bynta jong ka surok Khyndailad.

Haba rah ia kane ka mat ha ka kynta buh jingkylli hapoh ka Iingdorbar thaw ain, u Bah Adelbert u la ong ba ka jingpynkylla jaka thad jain jong ki briew ia ki jingker nar ha ki surok ha Khyndailad ka dei kaba la pyntip ha ka 22 tarik u bnai Risaw 2019.

U la ong ba kane ka kam ka dei kaba sngewkhia shibun bad ka dei ka jingijli ban peit khamtam ba ka Khyndailad ka dei ka jaka kaba ki nongwan shangkai pyrthei na kylleng ki ju wan haba ki wan jngoh sha kane ka Jylla.

Haba jubab halor kane, u Symbud Myntri Rangbah ka Jylla uba khmih ia ka Tnad Urban Affairs, u Bah Sniawbhalang Dhar u la ong ba kam shym la don satia kano kano ka jingujor kaba ki la ioh pdiang halor kane ka bynta.

Hynrei, watla katta u la pynthikna ba un bthah mardor ia ki ophisar ban iohi ba yn ym don kino kino ki ban pynkylla jaka thad jain ha kine ki jingker kiba la shna khnang na ka bynta ka jingshngain jong ki paidbah nongleit nongwan.