Byrngem iakhih ka seng ki nongshong die madan lada ym khot jingialang ka PTVC

Syllad | The Rising MeghalayaJanuary 22, 2025

Ka Seng ki nongshong dukan die madan ka Meghalaya & Greater Shillong Progressive Hawkers & Street Vendors Association (MGSPHSVA) ha ka 21 tarik Kyllalyngkot ka la byrthen ban pynlong da ka jingiakhih lada ka Provissional Town Vending Committee (PTVC) kam lah ban khot noh mardor ia ka jingialang ba kyrkieh hapoh ka ar sngi.

Ka MGSPHSVA ka la dawa ruh ban weng noh mardor ia ka jingpynbna paidbah bad ban pynsangeh ia baroh ki kam ba la leh da ka PTVC ia kaba ki la kynnoh ba ka dei ka Committee ba beain nalor ka jingsdang ia ki kam ban ia kam bad pyrshah bad pynmih ia ka thup kyrteng ki nongshong dukan kiba dei ban ioh syrnot ban shong die dukan madan.

Katkum ka jingpynpaw ka jong ki, kane ka kynhun ban jied ia ki nongshong dukan madan kiba dei hok ban ioh ka dei ban jied da ki nongmihkhmat da ka TVC ba la ithuh da ka Ain kumba la kren shai ha ka shithi kaba 13 tarik Nohprah 2022 kaba thung ia ka interim TVC ban leh ia ka sorbe, ban bishar ia ka jingiakam bad jingpyrshah bad pynrung kyrteng nalor kiwei pat.

Kane ka la mih hadien ka jingpynmih ba dang shen ia ka jingpynbna halor ka jingpynkynriah ia ki nongshong dukan dei madan na Khyndailad.

Ha ka shithi sha u Chairperson ka PTVC, ka President ka Association ka Kong Biolin Pyrtuh ka la ong “Ka la don ka jingpynkhein kaba jur namar ia ka jingpynbna la pynmih da ka TVC. Sngewbha shim ba haduh mynta hi ym pat don satia ka TVC hynrei tang ka PTVC. Ngi khot ia ka jingialang ba kyrkieh abd ka PTVC hapoh ka ar sngi naduh ba la ioh pdiang ia kane ka shithi ban iakren halor ki mat ba la pynpaw ha ka shithi bad halor ki shithi kiba la dep phah sha ka PTVC.”

Nalor kata ka kynnoh ruh ba ka PTVC kam dei ka bor treikam kaba la iohbor katkum ka Ain ban pynbna ia ki jaka shong dukan madan bad ka hukum ban pynkyriah lane mynjur ia ka Street Vending Plan.