Byrngem iakhih tyngeh ki nongtrei Muster Roll lada ym lah pynbeit ka sorkar ia ka dor bai bylla

Syllad | The Rising MeghalayaJanuary 17, 2025

Ka All Jaintia Muster Roll Workers & Labour Union (AJMRWLU) ha ka 16 tarik Kyllalyngkot ka la byrngem ban pynlong da ka jingiakhih kaba tyngeh lada ka sorkar jylla kam lah ban pynbeit thymmai halor ka dor bai bylla hapoh ka Jylla Meghalaya, ia kaba ki la pynpaw ba kam long shuh kaba iahap bad kane ka jinglong jingman ba mynta namar ka jingkiew dor ki mar ki mata ba kongsan.

Ha ka shithi sha u Myntri Rangbahduh ka Jylla u Conrad K Sangma, ka president ka AJMRWLU ka Kong Dayowanphi Iakai ka la ong, “Ngi la phah da ka jingthoh ban pynpaw ia ka jingbym sngewhun ia ka rai ba dang shen jong ka kynhun Myntri ha kaba iadei bad ka jingsiew ia ka dor bai bylla hapoh ka Jylla Meghalaya.”

“Ka Seng ka dawa ba dei ban pynbeit thymmai ia katei ka dor bai bylla bad ban pynmih ia ka jingpynbna hapoh ka 10 sngi. Ia kane ka dor ban pynbeit da kaba pynshong nongrim katkum ka jingkiew dor jong ki mar ki mata khamtam ki marbam mardih, bad ka jingsiew kaba T.300 kaba la pynbeit ha ka 1 tarik u Risaw 2018 ha ryngkat bad ka Dearness Allowance kaba hapdeng u snem 2019-2024 na ka bynta kiba don ha baroh ki kyrdan jong ki jingtreikam bad ban kyntiew ia ka dor bai bylla ban ioh ia ka dor kyllum lang,” k la ong.

Ka la maham ruh ba lada ym lah ban shimkhia mardor ia kane ka kam hapoh ka por ba la buh, ka seng kam banse ban shim ia ka lynti ban pynlong da ka jingiakhih kaba tyngeh hapoh ka jylla hi baroh kawei ban pynbor ia kane ka jingdawa. “Ngi kyrpad ia ka jingtuklar lem ba mardor ka jong phi halor kane ka kam khnang ban pynthikna ban pynioh ia ki hok bad ka jingsiew kaba iahap na ka bynta baroh ki nongtrei,” ong ka President.

Ka Seng ha ka shithi ka la kdew ruh ba ka dor jong ka bai trei kam long satia kaba ryntih bad ka bym iahap shuh haba ia nujor bad ka jingkiew dor jong ki mar ki mata bad kam long ruh katkum ka dor kaba ki dei bok ban ioh.

Kumjuh ka la ong ruh ba ka jingkyntiew kaba katkum ka 1 tarik Risaw 2018, ka long na ka bynta ki nongtrei bylla ki bym pat nang ne unskilled na ka T.196 sha ka T. 300 (ka jingkiew kaba da T.104), kiba la kham nang ne semi-skilled na ka T.208 sha ka T.340 (ka jingkiew kaba T.132), kiba la tbit ne skilled workers na ka T.220 sha ka T.300 (jingkiew kaba T.160) bad kiba la tbit bha ne highly skilled na ka T.244 sha ka T.420 ( ka jingkiew kaba T.176).

Hynrei, ka jingkyntiew ia ka dor bai bylla kaba la mynjur da ka kynhun Myntri ha ka 10 tarik Kyllalyngkot ka long, na ka bynta ki unskilled long T.419 sha ka T.525 (jingkiew kaba T.106), Semi-Skilled na ka T.474 sha ka T. 565 (Jingkiew kaba T.91), Skilled na ka T.530 sha ka T.605 (jingkiew kaba T. 75) bad Highly Skilled na ka T.586 sha ka T.645 (jingkiew kaba T.59).

“Kane ka pyni shai kdar ia ki jingshisha ba ka jingkyntiew ka la long kaba duna naduh ki unskilled haduh ki kyrdan highly skilled kaba long kaei kaei kaba sngew bynniaw jur bad ka bym lah satia ban pdiang,” ong ka Seng.

“Katkum ka histori ka jingkyntiew ka long kaba iahap salonsor ha baroh ki kyrdan kaba pynthikna ba kan ym don ka jingleh shiliang bad kaba iahap katkum ka rukom treikam katkum ka Minimum Wages Act, 1948, bad kumjuh  ka jingshim ia ka 1 tarik Risaw kum ka tarik ba la pyntreikam ia ka jingbuh dor ia ka bai bylla ba dei ban pynkylla hapoh 5 snem naduh ka tarik ba khatduh jong ka jngpynkylla,” ka la pynpaw shuh shuh.