Byrngem lypa ka VPP ban ym ïashim bynta lada u Lat u kren Hindi

Syllad | The Rising MeghalayaFebruary 2, 2024

Ka seng Voice of the People Party (VPP) kaba long kawei na ki seng ba don ha ka liang pyrshah sorkar, mynta ka sngi ka lah byrngem lypa ban yn ym ïashim bynta ha ka por ban  ai jingkren u Lat ha ka dorbar mang tyngka ka ban sa long shen jong ka dorbar thaw aiñ ka jylla, lada u kren da ka ktien Hindi khlem da pynkylla sha ka ktien English.

Kane ka rai ka lah mih ha ka por ba don jjngïalang ki nongmihkhmat ka seng ha ka 30 tarik u Kyllalyngkot, bad lah phah ruh da ka shithi halor kane ka rai sha u Lamphang ka dorbar thaw aiñ ka jylla u Thomas A Sangma.

Ha kane ka shithi ba lah phah sha u Sangma, u secretary ka VPP Parliamentary Party u Bah Heavingstone Kharpran u lah ong ka  dorbar mang tyngka ka long kaba kongsan bad donkam na ka bynta ka jingmyntoi lang jong baroh, ka long ruh kaba dei ba baroh ki dkhot ka ïing dorbar thaw aiñ kin snohkti lang halor ki rai kiba mih. Hynrei, lah dep ban sakhi teng ha ka dorbar ba lah dep, U Lat ka jylla u ai jingkren ha katei ka dorbar hakhmat ki dkhot ka ïing da ka ktien Hindi, kaba lah wallam ka jingbym sngewsuk hapdeng ki dkhot ka ïing kiba ym sngewthuh ne nang ïa ka ktien Hindi, bad donkam ruh ban buh ha ka jingmut ba ka ktien Hindi kam shim dei satia ka Official Language ne ka ktien pdeng jong ka jylla  Meghalaya.

“Halor kane ka bynta bad na ka liang ka Voice of the People Party, nga pynpaw da kaba burom halor ka rai kaba lah mih lyngba ka jingïalang jong ki dkhot nongmihkhmat ka seng  kaba lah long ha ka 30 tarik u Kyllalyngkot, ban buh jingkyrpad hakhmat jong phi ba ka jingai jingkren jong  u Lat ka dei ban long ha ka ktien English bad lada u Lat badonburom um lah ban ai jingkren da ka ktien English, ka ophis treikam jongphi kan buh da u  nong pynkylla ktien ïa baroh kawei ka jingkren jong u na ka bynta ka jingsngewthuh jong baroh ki nongmihkhmat” la ong u secretary ka VPP.

Shuh shuh u lah ong ruh da ka jinglah ban pynthikna ba ki jingïakren kiba mih ha ka dorbar mang tyngka kan long da ka ktien kaba ïasngewthuh lang da baroh ki dkhot, ngi lah ban pynthikna halor ka rukom treikam bakhuid ba suba, bym don ka jinglah shiliang bad ka synshar khadar kaba hok ba thikna.

“Ha kaba khatduh ym kaba kut, ka seng ka kwah ban kdew shai ba kan ym ïashim bynta satia lada ki bor ba dei khmih kim lah ban leh eiei halor kane ka mat ba lah kdew” la ong u Bah Heavingstone.