Byrngem mudui mukotduma ka KHNAM lada ym kyntiew ka Sorkar ia ka dor bainong sngi ki nongbylla

Syllad | The Rising MeghalayaDecember 13, 2024

Ka Khun Hynniewtrep National Awakening Movement (KHNAM) ka la byrngem ban mudui da ka mukotduma lada ka Sorkar Jylla ka dang pynslem ban pynkiew ia ka dor bainong sngi kaba rit eh jong ki nongbylla (minimum wage) sha ka dor ka ban iahap bad ka rukom im kaba mynta khnang ban pyntreikam ia ka jingthmu jong ka Minimum Wages Act, 1948.

“Lada yn dang pynslem ngin hap ban shim da ka lynti jong ka ain namar ka Sorkar Jylla ka la pynkhein ia ka kyndon Section 3 (b) jong ka Minimum Wages Act 1948, namar ka jingbym lah ban kyntiew ia ka bainong sngi wat hadien san snem,” ong u Working President ka KHNAM u Bah Thomas Passah hadien ba la aiti ia ka shithi sha ka Tnad Labour ha ka 11 tarik Nohprah.

U la ong ruh ba ka jingpynkiew kaba khatduh eh ia ka bainong ka dei naduh u snem 2018, kata kaba la iaid palat ia ka san snem katkum ka jingpruid dak da ka Act ban kyntiew ia ka bainong ia ki nongbylla kiba hap ha ka thup kum ki unskilled, semi-skilled, skilled bad highly-skilled category.

“Kumta kane ka long kaba beain bad ngi la kyrpad ia ka Tnad Labour ba kan khmih halor kane ka kam bad pynthikna halor ka jingpynkiew ia ka dor bainong sngi kaba dei ban long katkum ka jinglong ka iew ka hat bad katkum ka rukom im,” ong u Bah Passah haba bynrap, “Ka Tnad Labour ka la pyntip sha ngi ba ki la pyndep ia ka kam bad ki la dep aiti ia ka jingtyrwa sha ka Tnad Finance bad kane ka kam ka dang sahkut bad ka sorkar Jylla.”

“Kumta ruh ngi la kyntu ia ka sorkar Jylla ba kane ka dei ka bynta kaba kongsan namar ka ktah ia kiba bun bah ki longiing longsem hapoh ka Jylla. Nga tharai ba ka kham kongsan ban ia ki tamasa ruh.Kumta ngi kyntu ia ka sorkar ba kan khmih noh mardor ia kane ka kam,” u la bynrap.

Ha kajuh ka por ka KHNAM ka la kynnoh ruh ba ka Labour Bureau ka la pulom ban pynlong ia ka jingwad bniah halor ka jingkiew dor jong ki mar ki mata hapoh ka Jylla hashwa ba kan aijingmut ha ka ban pynkiew ia ka Variable Dearness Allowance (VDA) kumba la kdew da ka Act 1948.