Byrngem pynhiar kput ka KSU lada jia eiei ki samla pule ka jylla ha IFCAI Agartala
SHILLONG: Ka Khasi Students Union (KSU) ka la byrngem ban pynhiar kput ia ki Bengali ha Shillong lada jia eiei ia ki Samla Pule na jylla ha Tripura na ka daw jong ka jingiakynad hapdeng ki Samla pule Bengali bad ki Samla Pule na kiwei ki jylla ka thain shatei lammihngi kynthup ia ka Meghalaya.
Kumba yn shu pynkynmaw hangne ba ka jingiakynad ka lasdang na ka daw jong ka jingshah kren kynshlein kawei ka samla pule kynthei hala ki jong ki para jaidbynriew Bengali, hynrei lawan iarap ia katei ka samla pule da ki samla pule jong kiwei ki jylla ka thain shatei lammihngi. Hynrei une u samla pule u la leit pan jingiarap na paralok jong u bad ka la saphriang ka khubor lamler bad ka don ka jingiakynad jong ki samla Bengali bad ki samla pule jong kiwei ki jylla.
![](https://www.syllad.com/wp-content/uploads/2024/09/JIT-Vacancy-823x1024.avif)
Katei ka jingiakynad hapdeng ki samla pule Bengali bad ki samla pule na kiwei ki jylla jong ka thain shatei lammihngi ka la jur haba kumba 300 ngut ki samla pule Bengali ki la wanhiar thma ha ka Sngi Ba Ar ha ka jaka pule IFCAI Agartala haba ki la pynjulor ia katto katne tylli ki kali kynthup kawei ka Eco Sports ba dang thymmai jong uwei samla pule na ka Jylla Meghalaya bad ka Jeep Compass jong u samla pule na Mizoram.
Kane ka jingmaham ka la mih na ka shyntur jong u President Rangbah jong ka KSU u Samla Lambok Marngar haba iakren bad ki nongthoh kotkhubor mynta ka janmiet hadien ka jingiakynduh jong ka KSU bad ki kmie ki kpa jong ki Samla Pule ba pule ha IFCAI Agartala bad u Chief Minister ka Jylla u Conrad K Sangma.
U Samla Marngar u la ong ba lada jia eiei ia ki Samla Pule na ka Jylla ha Agartala ka KSU kan nym shim ia ka jingkhlieh lada jia eiei ia ki briew Bengali kiba shong basah ha Nongbah Shillong.
Ha kawei pat ka liang, u Sangma ka jylla ula ong ia ki nongialam ka KSU bad ia ki kmie ki kpa jong ki Samla pule ka IFCAI ba u la dep iakren bad u Chief Minister jong ka Tripura halor katei ka kam ban pynthikna ia ka jingshongshngain jong ki samla pule ka jylla ha Agartala.
U Chief Minister u la shim ia ka rai ban phah ia ka kynhun tohkit halor ka jinglong jingman ha Agartala ia kaban ialam da u Deputy Inspector General of Police ryngkat arngut ki SP bad katto katne ngut ki kmie kpa bad lada donkam katei ka kynhun kan wan ialam noh ia ki samla pule ka jylla sha iing haduh da wanphai ka shongsuk shongshngain.
Ha kawei pat ka liang, ki dkhot jong ka KSU ha ka jingialam jong u General Secretary Samla Donald V Thabah ki la leit khang khyrdep ia ka jaka pule IFCAI kaba don ha Dhanketi, Malki mynne ka sngi kum ka da ka jingpyrshah ia ka jingbymlah jong ka IFCAI ban pynthikna ia ka ka shongsuk shongshngain jong ki samla pule ka jylla ha IFCAI Agartala.
Ki bor pyniaid district ha ka jingialam jong u Executive Magistrate bad ki pulit ki la wan hiar mar mar sha katei ka jaka pule ban teh lakam ia kano kano jingjia.
Ha kawei pat ka liang, U Asssistant Inspector General of Police (A) u Bah G K Iangrai u la iathuh ba u DGP ka Jylla u la dep iakren bad u DGP ka Tripura khnang ban pynthikna ia ka jingpahara kaba biang ia ki samla pule ka jylla ha Agartala.
U la pyntip ba kino kino ki samla pule ne ki bahaing hasem jong ki samla pule ha IFCAI Agartala kiba donkam jingiarap ban pyntip sha u nombar 94363-37946 bad 60330-90114.
Ha IFCAI University ki don 17 ngut ki samla pule na ka Jylla Meghalaya kiba kynthup ia ki 11 ngut ki samla shynrang bad 6 ngut ki samla kynthei.
Shuh shuh na ka liang jong u Vice Chancellor jong ka IFCAI u la iakynduh bad katto katne ki samla pule na ka thain shatei lammihngi haba u la kular ban ai pahara kaba biang ia ki bad kyrpad ia ki ban nym leitphai sha la ki iing ki sem.
Katba ki samla pule pat ki pynpaw ba ki dang don ha ka jingshongsyier bad kila pan ban leit phai sha ki iing ki sem jong ki shipor namar haduh mynta mynne ka dang don ka jingbyrngem byrsit ia ki na ki samla pule Bengali bad ha kano kano ka por la ban jia jia eiei ia ki.
Leave a Reply