Byrthen iakhih ka VPP lada pulom ka Sorkar ban weng ia ki jingeh halor ka jingkiew dor ki mar bam

Syllad | The Rising MeghalayaSeptember 16, 2024

Ka liang pyrshah Voice of the People Party (VPP) ha ka 16 tarik Nailur ka la dawa na ka Sorkar Jylla ba kan pynlong ia ka jingtohkit bad ban leh ei ei halor ki daw ha lyndet ka jingkiew dor jong ki mar ki mata ba kongsan khamtam ki marbam mardih ha ka Jylla.

“Ngi kyntu jur ia ka Sorkar ba kan bishar bniah bad buddien ia ki jingtreikam jong ki khyrdop bad ki jaka talasi ha ki surok bah National Highway kiba la don bynta bha halor ka jingkiew dor jong ki mar ki mata ha ka Jylla,” ong General Secretary ka VPP uba dei ruh u MP ka Shillong u Dr Ricky AJ Syngkon ha ka shithi sha Myntri Rangbah ka Jylla u Conrad K Sangma.

Kane ka shithi ka la kdew ruh halor kiwei pat ki jingdawa kiba kynthup ia ka jingdonkam jong ka Sorkar ban pynthikna ba ki nongrep kim dei ban shah iuhroit ha ki nongkhaii bad ba ka dei ban don ka rukom buh dor kaba dei biang bad ka rukom pyniaid khnang ban iada ia ka bha ka miat jong ki nongpynmih mar bad ki nongthied kumjuh namar ka jingshim kabu khlem nongrim.

Ka VPP ka la ban jur ruh halor ka jingdonkam ban pynkhalin ia ka Tnad Food & Civil Supply ba kan pyntreikam ia ki dor ki mur ba la buh beit ryntih da ka Sorkar bad ban weng ia ki jingpynkhein kyndon ha kaba iadei bad ki dor ki mur kumjuh ia ki jingeh ha ka leit ka wan namar ka jingkieng Umiam namar ka jingbym ioh iaid lyngba ki kali heh kiba kit ia ki mar ba kongsan sha ka nongbah bad kiba la shah pynbor ban iaid lyngba ki lynti kiba kham jngai. Kane ruh ka lah ban long kawei na ki daw ka jingkiew dor jong ki mar ki mata namar ka jingkiew ha ka bai leit bai wan.

“Da kaba khmih ia ka Meghalaya kum ka Jylla kaba hap ban shaniah ia ki mar ki mata na shabar ka Jylla, ka Sorkar mardor ka dei ban shim ia ki sienjam ban shna ia ki lynti iaid kiba kham jan ban pynsuk ia ka kit ka bah ia ki mar bam ba kongsan,” ong u Dr Ricky lyngba ka shithi.

“Lada ym lah ban shim ia kine ki sienjam ha ka por kaba biang, ka VPP kam banse ban shim da kiwei pat ki sienjam, kata kaba kynthup ban bteng ia ki jingiakhih, ban dawa ia ka hok na ka bynta ki paidbah ka Meghalaya,” maham u nongialam ka VPP haba kyntu ia ka sorkar ba kan shim mardor ia ki sienjam ban weng ia kine ki jingeh bad ban trei na ka bynta ka jingmyntoi jong ki paidbah nongshong shnong ka Jylla.

Lah ban kdew ba ka VPP ha ka 13 tarik Nailur ka la pynlong da ka jingiakhih shongkyllain mungor ba shi sngi ban pynpaw pyrshah halor ka jingkiew dor jong ki mar ki mata ba kongsan ha ka Jylla. Katkum ka jingpynpaw jong u Bah Syngkon, ka VPP ka ngeit skhem ba kaba kum kane ka jingkiew dor palat pud jong ki mar ki mata ka la nangjur shuh shuh namar kiba bun ki daw, kata kaba kynthup halor ka jingdon jong bun tylli ki khyrdop siew khajna ha ki surok bah National Highway, bad ka jingbym lah jong ki bor sorkar ban khanglad ia ka jingiuhroit ia ki nongrep, ki nongthied nongpet bad kiwei kiwei.