Byrthen iakhih paidbah ka HYC lada ym shimkhia ka Sorkar halor ki 7 tylli ki mat iakhun pyrshah drok

Syllad | The Rising MeghalayaOctober 5, 2024

Ka Hynniewtrep Youth Council (HYC) ha ka 4 tarik Risaw ka la byrthen ban pynlong da ka jingiakhih paidbah lada ka sorkar kam leh ei ei ha kaba iadei bad ki 7 tylli ki mat jingdawa ban iakhun pyrshah ia ka jingshyrkhei jong u drok ha ka Jylla.

Ha ka shithi sha u Myntri Rangbah ka Jylla u Conrad K Sangma, u President ka HYC u Bah Roykupar Synrem u la ong, “Ngi kyrmen bad kyntu ia ka sorkar Jylla ban pdiang ia ki jingdawa ba shonghok jong ka seng na ka bynta ka bha ka miat jong ki nongshong shnong ka jylla hi baroh kawei. Hynrei lada ka sorkar kam shimkhia ban leh ei ei ha ka por kaba biang halor kine ki jingdawa ki jong ngi ka seng kam banse ban pynlong da ka jingiakhih paidbah ban pynthikna ba ka Sorkar kan shimkhia ia ki jingdawa ba shonghok ki jong ngi.”

Kine ki hynniew tylli ki jingdawa jong ka HYC ki kynthup ia ka treatment & rehabilitation, free detoxification, OST bad day-care centres ha baroh ki District kiba jyllei droks, ban pyntreikam ia ki fast track courts/special courts ia ki case kiba hapoh ka NDPS Act 1985, ban pynkhlain ia ki sienjam ban khanglad ia ki kam shalan drok bad ru ban buh ia ka ophis jong ka Narcotics Control Bureau ha Shillong.

Ia kane ka rai la shim hadien ka jingialang ba la pynlong bad ki nongialam shnong bapher bapher, kiba kynthup ia ki Rangbah Shnong, ki Seng Longkmie, Seng Samla bad ki riew paidbah ha ka 28 tarik u Nailur ba ladep. Ha kane ka jingialang la rai ruh ban sdang ia ka mishon Drugs Elimination and Enforcement of DREAM (DEED) Mission.

Une u nongialam ka HYC u la ong ruh ba ka Sorkar ka la sdang ia ka Drug Reduction, Elimination, and Action Mission (DREAM) ha ka 27 tarik Jylliew 2023 da ka jingthmu ban pynkylla ia ka Jylla kum ka “Meghalaya kaba lait na u droks”.

“Ka long da shisha ka polisi treikam kaba biang bha, ym don jingartatien ia kata da ka thong ban rat dyngkhong ia u drok na ka imlang ka sahlang ia kaba baroh ngi angnud bad khmih lynti. Hynrei kaei kaba sngewkhia na ka bynta jong ngi ka long ba kane ka Mission/Policy ruh ki long kumba long kiwei pat ki kot ki sla jong ka Sorkar ki ba i biang tang ha ki jingthoh, hynrei ki bym shym la lah ban pyntreikam kumba la angnud. Kumta, khnang ban pynurlong ia kane ka thong jong ka DREAM, ngi kwah ban dawa ban leh ei ei noh kyrkieh halor kine ki hynniew tylli ki mat,” ong u Bah Roykupar ha ka shithi.

Haba pynshai bniah halor kine ki mat, u president ka HYC u la ong ba ha Meghalaya ki don 10 tylli ki Rehabilitation Centre kiba treikam ia kiba la bei tyngka da ka Ministry of Social Justice & Empowerment (MoSJE), ka sorkar Pdeng, ba kyrshan da ka sorkar Jylla lane kiba pyniaid da ki kynhun shimet. Ka jingshim briew jong kine ki Centre ka long haduh kumba 300 ngut ki nongpang katba ka jingdon jong ki nongdih drok ha ka Jylla ka la kot haduh kumba 3 lak ngut, kata katkum ka jingkren da u Myntri ba dei khmih ha ka Dorbar Synrai kaba dang shu kut shen. Mynta ka jingkylli kaba mih ka long shaei kine ki nongdih drok kiba sah kin ioh jingsumar?”

Shuh shuh u la ong ba katkum ka mat jong ka DREAM Document ba la pyllait da ka sorkar Jylla la shem ba ka jingdon jong ki nongpyndonkam drok ka nangkiew man ka sngi, kum ka long kaba donkam kyrkieh ban don noh ia ka Detoxification, OST and Day Care Centres ban ai jingshakri ei sha kito kiba la kyrni ha u drok ha baroh kine ki District.

Halor ka jingdawa ban buh ia ka ophis jong ka Narcotics Control Bureau ha Shillong, u president ka HYC u la ong ba mynta ka NCB ka don ia ka Ophis ha Assam, Arunachal Pradesh, Manipur bad Tripura.

“Dang shen u MoS Home Affairs, ka Sorkar India, u Nityananda Rai ki la pyntip ba ka jylla Meghalaya ka la kylla long ka lynti ïaid lynti bad shallan tuh ïa u drok na Manipur sha kiwei pat ki Jylla jong ka Ri India. Bad ka long ka jingshisha ba ka Meghalaya kam dei tang ka lynti iaid hynrei ka dei ka Jylla kaba bun ki nongdih drok bad jingdon jong ki nongdih drok ka la kiew haduh katta katta ha kane ka shisnem, kata na ka 2 lak ha u snem 2023 sha kumba 3 lak ha u snem 2024. Kumta, na ka bynta ka jingïatreilang kaba kham bha bad ban pynduna iaka jingpynpoi drok donkam ban buddien bha ïa ki case bad ki kam khaii drok ha ka Jylla, kumta donkam ban buh iaka ophis ka NCB ka ha Meghalaya,” u la bynrap.