Byrthen iakhih paidbah ki 6 seng ba thmu kynriah ia u Ethelbert Kharmalki kum DC East Jaintia Hills

Syllad | The Rising MeghalayaNovember 17, 2021

Ki sengbhalang kiba kynthup iaka EJNC, JSM, JSU, KSU, FKJGP bad HNYF kila pynpaw ka jingpyrshah kaba jur iaka khubor hamsaia ba ka don ka jingthmu ban kynriah kam ia u Deputy Commissioner, East Jaintia Hills Bah Ethelbert Kharmalki.

U Bah Ethelbert Kharmalki ula shimti iaka kam DC ha East Jaintia ha u bnai Nailur (September) 2020 bad tang shisnem ka sorkar kala thmu ban pynkynriah ia u na ka kam DC, la ong kine nongialam jong ki sengbhalang na East Jaintia Hills.

Ki nongialam jong ki 6 tylli ki seng kiba pyrshah ia kane ka jingthmu ka sorkar kila lum jingialang bad kila rai da kawei ka sur ban pyrshah bad dawa na ka sorkar ban pynneh shuwa ia u DC Ethelbert Kharmalki halor ka nongrim ba kane ka jingkynriah kam iaki officer khlem pat kut ka samoi treikam jong ki ka pyntlot bad ka pynsahteng iaki kam pynroi hapoh ka District.

“Ngi lah sakhi baka jingshakri jong u Bah Kharmalki kum u DC ka EJHD kalong ka jingkyrkhu iaka District namar u ne u DC u don ka jingiadei kaba iajan bha bad ki nongshong jong ka District bad u long u ruh u briew uba kloi ban iarap ia kiba shem jingeh,” la ong u kyrwoh na kine ki 6 seng.

“Ka sorkar Jylla ban pynsangeh shuwa ia kane ka jingthmu kynriah kam noh u DC bad lada ka sorkar ka iaid shakhmat ngi la rai ban pynlong jingiakhih paidbah,” pynkut u kyrwoh na kine ki 6 seng.