Byrthen ka CoMSO ban nang pynjur ka jingïakhih haduh ba urlong ka jingdawa ILP

Syllad | The Rising MeghalayaApril 23, 2019

SHILLONG:  Ka Confederation of Meghalaya Social Organisations (CoMSO) kaba la pynlong ïaka jingrah lama iong ha kylleng ka Jylla ha Khasi, Jaintia, Bhoi bad Rilum Garo kala byrthen ban nang pynjur ïaka jingiakhih ban dawa na ka sorkar ban pynlong aiñ ïaka inner line permit (ILP) haka sngi Baar.

U General Secretary of the Hynniewtrep Youth Council (HYC) bad u nongialam ka CoMSO, u Roy Kupar Synrem ula ong “Ngi dawa na ki party riewlum ban kin mih shakhmat ban pynthikna ba ki ieng na ka bynta ki trai ri ne kam shimet jong ki.”

Haka elekshon kine ki party riewlum kila khlei ïaki juban lak kum ban leh noh mynta mynta  ban pyntreikam ïaka ILP naduh ka Hill State People’s Democratic Party (HSPDP), People’s Democratic Front (PDF) and United Democratic Party (UDP), pynban ki sngap man man  wat hadien shisnem bala iaid ka por.

Une u nongialam ka CoMSO ula dawa na u chief minister Conrad K Sangma ban khot jingialang ka MDA bad ban ai ka rai ban thikna mano ba kwah ban pynlong aiñ iaka ILP bad mano ba pyrshah.

Dangshen u Myntri Rangbah ula ong ba ym dei ban pynlong ishu iaka ILP, katba u symbud myntri rangbah u ai jingkyrmen ban pynlong aiñ ILP ha Jylla.

U Roy Kupar ula pynkymmaw ba u symbud myntri rangbah ka jylla u kwah ban pynkylla ïaka Meghalaya Resident Safety and Security Act (MRSSA), 2016 kaba ban ïasyriem kum ka ILP.

“Ngim pyrwa lada ka sorkar ka thmu ban pyntreikam da ka Bengal Eastern Frontier Regulation, 1873, hynrei kaba donkam kalong ban wanrah ïaka aiñ kaba pyrkhing kum ka ILP,” ong u Roy Kupar Synrem.

Hashuwa ban iakren bad ki nongthoh khubor ka CoMSO kala sieh iaki lama iong bad jingthoh ha kynroh bad ki jain kylleng kylleng, khamtam ha nongbah Shillong haka jingpahara kaba jur jong ki bor ka aiñ.

La lap ba ki Pulit kila weng bad kurup ia ki lama ba la sieh da ki kynhun jong ka CoMSO ha Khyndailad.

U Vice Chairman CoMSO bad president jong ka Hynniewtrep Achik National Movement (HANM) Lamphrang Kharbani ba kane ka jngrah lama iong ka dei ka jingsdang jong ka jingiakhih bad kin nang pynjur ka jingiakhih haduh ba jop bad urlong ka jingdawa ILP haka jylla.