Byrthen ka ECC ban pynjur jingïakhih lada ka sorkar kam khang mardor iaki Coke Factory

Syllad | The Rising MeghalayaAugust 9, 2021

Ka Environment Co-ordination Committee (ECC), Elaka Sutnga kala byrthen ban pynjur iaka jingiakhih paidbah lada ka sorkar kam khang mardor ia baroh ki karkhana Coke Factory beaiñ kiba don ha East Jaintia Hills District.

Katkum ka jingpyllait khubor u ma Mehiwot Shadap publicity secretary ECC ula ong “Ka khubor kaba ngi phah sha ka sorkar kum ki khun jong ka elaka baroh kawei, lada ka sorkar kam lah ban khang ia kine ki coke factory, ngin sa khot biang ia ka jingialang ia baroh ki khun ki hajar jong ka elaka ban rai ba ngim khot shuh da ka peace rally, hynrei kan long ka protest rally ban pyrshah iaka sorkar.”

“Ki khun ka elaka kim lah shuh ban shah ia ka jingsma jong ka lyer kaba mih na kine ki coke factory, namarkata wat pynbor ia ngi ki khun jong ka elaka ban ia mih ban leit tur wat shaduh sha secretariat. …Ngin ia mih ngim salia namar ngi tip hi ba ngin sa iap hi da kane ka tdem coke lada ngim ia mih, bad halor kane ka nongrim ngi kyrpad ia ka sorkar ba kan sngewbha ban leh tyneh ia kine ki coke factory,” la ong shuh shuh ka kyrwoh na u publicity secretary ka ECC.

Ha kajuh ka por na kaliang ka ECC ka pynpaw ka jingsngwnguh ia u myntri kam pohïing ka Jylla uba la hukum ia u SP ka East Jaintia Hills ban khang ia baroh ki karkhana Coke Factory beaiñ ha East Jaintia Hills bad ban tohkit nangno ki ioh ia u dewiong ban saiñ rnga dewiong.

Shuh shuh ka ECC kala kala ong ba ka bor synshar district East Jaintia Hills kala khang ia ki katto katne ki karkhana Coke kiba treikam beaiñ, phewsw la lap ba kim patiaw satia iaka hukum u DC bad ka jong u Home Minister bad ki dang iaid shait shait ban thang dewiong ha kine ki karkhana.

Kane ka jingleh kine ki karkhana kala pynsuba jur iaka ECC ba kadon kaei kaei sha lyndet.

U Ma Reading War, Legal Adviser jong ka ECC ula ong ba katkum ka jubab RTI kaba kila ioh ki don haduh 48 tylli ki karkhana coke kiba la ioh Single Window Agency ban seng iaki karkhana #CokeFactory ha East Jaintia Hills District. Nalor kata ula ong ba 7 tylli kila ioh syrnod Consent to Operate (CTO) ne ban pynmih rnga dewiong bad 6 tylli kila ioh Consent to Establish (CTE) ban seng iaka karkhana.