Byrthen ka ECC ban ujor da ka PIL bad sha ka Human Rights Commission halor ki kharkhana Coke beaiñ

Syllad | The Rising MeghalayaJuly 16, 2021

Ka Environment Co-ordination Committee (ECC), Elaka Sutnga haka sngi Thohdieng kala byrthen ban ujor mukotduma PIL bad ban ujor ruh sha ka Human Rights Commission halor ka jingjyllei ki kharkhana saiñ rnga dewiong ne ki Coke Factory kiba beaiñ ha East Jaintia Hills District.

Ia kane ka ECC kala ong hadien bala wan iakynduh bad u Deputy Commissioner, East Jaintia Hills District uba la pynmih iaka jingpynbna haka 15 tarik ban khang iaki kharkhana saiñ rnga dewiong kiba ym pat ioh iaka Consent to Operate (CTO) kim lah satia ban sdang pyntreikam iaki kharkhana ne ban pynmih ia u rnga dewiong haka district.

Katkum ka jingpynbna u Deputy Commissioner, East Jaintia Hills District Bah E Kharmalki ula ong ba tang ki Coke Factory kiba ioh iaka Consent to Operate (CTO) kiba lah ban sdang iaka jingtreikam ne pynmih ia u rnga dewiong.

U Kharmalki ula ong shuh shuh “Ki Coke Factory kiba la ioh tang iaka Consent to Establish (CTE), hynrei ki bym pat ioh pat iaka CTO kim lah ban sdang treikam lane saiñ ia u rnga dewiong.”

Pynbna u DC EJH ba tang ki kharkhana Coke kiba ioh CTO ki lah ban saiñ rnga dewiong

“Ki Coke Factory kiba la ioh tang iaka clearance certificate na ka Single Window Agency (SWA) kim lah da lei lei ban shna kharkhana ne ban pynmih ia u dewiong bala sain rnga (coke),” ong u DC ha ka jingpynbna paidbah.

Ka ECC kala ong ba u DC ula ai da ka show cause notice ne ban pan jingshai na ki trai kharkhana hapoh 10 sngi, hynrei ym don satia mano mano ba jubab iaka show cause u DC bad kane kala pynlong ia u ban pynmih iaka jingpynbna paidbah ban iatiplang u paidbah salonsar.

“Kane ka jingbym khein snep ki trai kharkhana iaka show cause notice u DC ka pyni shai kdar ba baroh ki kharkhana kiba ieng rasong ha Elaka Sutnga kim don satia iaki kot ki sla ba ki ioh jingbit ban sdang iaki kharkhana sain rnga dewiong ha kane ka elaka,” ong ECC haba pyllait iaka khubor bad bynrap ba ba ka ECC kan ujor sha ka Human Rights Commission bad kynnoh ba khein sting ka Meghalaya State Pollution Board (MSPCB) iaka jingktah jong kine ki kharkhana iaka koit ka khiah ki nongshong shnong ka Elaka Sutnga.

Ka ECC kala ong ba ka MSPCB kala dei ban khot iaka jingpynsngew paidbah halor kine ki kharkhana sain rnga dewiong ban tip iaka sur jong u paidbah.

Shuh shuh ka ka ECC ka la ong ba wat kito ki ba la ioh CTO hynrei baroh hi ki dei ki bym pat don ia ki kot ki sla na ki department ki bapher bapher ha shuwa ban pyniaid iew ia u ne u rnga ba mih na ki kharkhana kat kum ki ain.

Ka ECC kala ai klhublei ia u Deputy Commissioner halor ka jingshimkhia jong u ban pyndep iala ka kamram ban khang ia baroh ki kharkhana ki bym shym la ioh satia iaka CTO ne ka jingbit ban sdang ia kine ki kharkhana sain rnga dewiong.

U ma Bas Bareh, u wei na ki rangbah na ka shnong Jalaphet u ong ha ki katto katne ki snem ba la dep ki don kum kine ki kharkhana kiba thmu ban shna kharkhana hapoh shnong, hynrei namar ba ki khun jong ka shnong kila pyrshah jur la pyndam iaka kharkhana. Une u rangbah ula wer ia baroh ki khun ki raiot ka elaka Sutnga ban mih shakhmat ban kyrshan iaka ECC ban ieng pyrshah ia kine ki kharkhana kiba ktah iaka mariang abd ka koit ka khiah u noingshong shnong.