Byrthen ka HYC ban ujor sha ka NGT halor ki kharkhana saiñ rnga dewiong

Syllad | The Rising MeghalayaMarch 9, 2021

Ka Hynniewtrep Youth Council (HYC) East Jaintia Circle bad Narpuh Circle kala byrthen ban ujor sha ka National Green Tribunal (NGT) halor ka jingioh jong ki kharkhana saiñ rnga dewiong (Coke Factory) ban ieng rasong ha East Jaintia Hills District haka sngi ba Ar.

Ka HYC haka jingialam u vice president HYC East Jaintia Circle Michal Chyrmang, u publicity secretary HYC Narpuh Circle P Syiemlieh, president HYC Narpuh Circle Keldrim Sumer kila leit ai da ka dorkhat ha u Deputy Commissioner, East Jaintia Hills District namar ba kiba bun ki kharkhana saiñ rnga dewiong ki dei kiba ioh ia u dewiong beaiñ.

Nalor ka jingujor halor ki coke factory, ka HYC kala ujor ruh halor jingwan khlong maw beaiñ ki nong Assam ha wah Malidor.

U Michal Chyrmang ula ong ba na kaliang u DC un shimkhia halor kane ka jingdawa jong ka HYC. “Ngin ym ailad ban leh iaki kam beaiñ bad lada u DC um lah ban leh eiei, ngin hap ban ujor sha ka NGT ba kan pynshitom ia kiba pynkhein ïaki aiñ,” la ong une u nongialam ka HYC.