Byrthen ka JAC ban ujor sha ka iingbishar pyrshah ia u VC ka NEHU namar kam thungkam

Syllad | The Rising MeghalayaNovember 9, 2023

Ka Joint Action Committee (JAC) ka NEHUTA, NEHUNSA bad NEHUSU haka sngi Balang ki la byrthen ban ujor sha ka iingbishar Meghalaya High Court ba kan tuklar lem ha kaba iadei bad ka jingpynkhein ia ki kyndon jong ka UGC Model CRR (Cadre Recruitment Rules) da u Vice Chancellor jong ka skulbah NEHU u Prof PS Shukla.

Haba kren sha ki lad pathai khubor na ka liang u Chairman ka JAC u Prof Lakhon Kma u la ong ba na ka liang ua VC u la pyrshang ban ialam bakla ia ki samla pule bad ki nonghikai ka NEHU kumjuh ia ki paidbah ka jylla ha kaba iadei bad ka jingthung kam sop sop ia u Rohit Prasad kum u Technical Consultant.

U Prof Shukla ha ka 4 tarik mynta u bnai u la kam ba ka jingthung ia u Rohit Prasad ka dei kaba la leh lyngba ka jingmynjur da ka University’s Executive Council (EC). U Shukla u la ong ruh ba u VC u don ia ka bor ban thungkam shipor na ka bynta baroh ki Group A/Group B post.

Hynrei na ka liang u Prof Kma u la ong ba ki jingkren jong u VC ki long baroh ki bym shisha bad kiba ialam bakla ia ki kynhun kiba don bynta hapoh ka University bad ia ki paidbah, bad ruh ba ka JAC kam banse ban leit sha ka iingbishar Meghalaya High Court ba kan tuklar halor kane ka phang.

Nalor kata u Prof Lakhon ula kam ba katkum ki kyndon ka UGC Model CRR ka pynpaw shai ba ki VC jong kano kano ka skulbah kim lah ban thungkam klumar. “Ki kyndon ka UGC Model CRR ki kdew shai ba lada ka skulbah ka donkam nongtrei ka dei ban pyntip shaka UGC na ka bynta ban mang pisa, hadien bala ioh jingmynjur na ka UGC ka skulbah ka dei ban pyntip paidbah lyngba ki Advertisement haki kotkhubor bad hadien kane yn sa shong ka Selection Committee ban leh iaka ba donkam kum ka Interview.

Shuh shuh u Prof Lakhon ula pynpaw ruh ba na ka liang u VC um shym la bud ia kine ki kyndon ba la kdew haneng hynrei ula shu pyntip beit bala thung ia u Rohit hadien ba ula shim hi iaka Interview bad aimynjur da ka executive council.

Halor kane ka jingpynkhein ain jong u VC, u Prof Kma u la ong ba na ka liang ka JAC ka la shim ia ka rai ban thoh sha ka President ka Ri India kumjuh sha u Lat ka jylla ban ujor pyrshah ia u. Halor kane ka phang u la ong ruh ba ka JAC kan sa shong biang ia ka jingialang lashai ka 9 tarik ban khmih ha kaba iadei bad ki jingiakhih ba kin pynlong nangne shakhmat bad ruh ban shim rai halor ki sienjam ban ujor sha ka iingbishar ha kaba iadei bad kane ka phang.