Byrthen ka KSU ban ujor sha ka NGT halor ka jingkylla rong ka wah Lukha

Syllad | The Rising MeghalayaDecember 21, 2020

Ka Khasi Students’ Union (KSU), Narpuh Circle hapoh ka jingialam u KS Suchiang President KSU, S Bamon General Secretary KSU lem bad katto katne ki dkhot kila leit ia kynduh bad dorkhat ban dawa jingtohkit ba laitluid halor ka jingkylla rong blue ka Wah Lukha ha u bah E Kharmalki, Deputy Commissioner East Jaintia Hills District haka sngi Nyngkong.

“Ka jingkylla rong ka Wah Lukha kala jia shi jia bad mynta ka sngi ngi la dawa naka ophis u Deputy Commissioner East Jaintia Hills ban leh noh da ka jingtohkit ba laitluid (Independent Inquiry) ka bymdon ka jingshah liang ban lap ia ka jingshisha,” ong u President ka KSU u KS Suchiang.

Kumban shu pynkynmaw baka jingkylla rong blue ka wah ka la jia naduh u snem 2007, bad kala wanrah ka jingiap pathar dohkha bad per ha shilynter ka Wah Lukha.

“Ha kane ka kynti ngi dawa na ka ophis Deputy Commissioner EJH ban shimshikhia ban tohkit bniah khnang ban paw mano ba donkti ban pynjaboh haduh katne ia kane ka Wah Lukha kaba baroh u paidbah u suba jur ba dei na ki kharkhana dewbilat,” la ong une u nongialam ka KSU bad bynrap “lada ka sorkar kam shimkhia kin mudui da ka mukotduma sha ka sha ka National Green Tribunal (NGT).”