Byrthen ka KSU lada ym thung ia ki riewlum ka Jylla haka kam thaw policy hapoh ka MDRF

Syllad | The Rising MeghalayaSeptember 24, 2024

The Khasi Students’ Union (KSU) ka la dawa na ka sorkar Jylla ba kan pynmih ia ka jingpynbna ha ki rynsan paidbah ha kaba iadei bad ki rukom thungkam na ka bynta ki nongthaw policy hapoh ka Meghalaya District Research Fellowship (MDRF).

Ha ka shithi sha u Development Commissioner, Planning, Investment, Promotion and Sustainable Development Department (PIPSDD) u Sampath Kumar, ka KSU lyngba ka Employment Monitoring Cell ka la pynpaw ia ka jingbym hun halor ka rukom thungkam bad pynrung kam ia ki nongthaw policy hapoh ka MDRF namar ka jingbym pyntreikam ha ka lynti kaba shai bad ka bym shah liang.

Ka Bharti Institute of Public Policy ha ryngkat ka jingiatreilang bad ka PIPSDD, ka Sorkar Meghalaya ki la pynmih ha ka LinkedIn ha u bnai Nailur ia ki 28 tylli ki kam kiba lait kaba kynthup ia 24 tylli ki kam District Research Fellows, 2 tylli ki kam Data Scientist/Senior Researchers bad mar kawei ka kam Senior District Research Fellow bad Project Coordinator.

“Ka seng ka la kyntu ba kum ia ka kam research/projects/data analysis & collections bad kiwei dei ban aiti beit sha ka North Eastern Hill University (NEHU) lem bad kiwei pat ki University ha ka Jylla ba kin wad ia ki briew na ka Jylla bad ailad ia ki trai shnong Riewlum ka Jylla kiba tip bha ia ki kam jong ka Jylla ha ka jaka jong ki agency kiba na bar,” ong u Chairman ka KSU Employment Monitoring Cell u samla Reuben Najiar ha ka shithi.

“Lada ka Sorkar ka thmu ban iaid shakhmat bad ka ISB ha ryngkat ka jingiatreilang bad ka MDRF, kumta ruh ka seng ka dawa ba ia kum kine ki kam dei ban pynbna ha ki rynsan paidbah khnang ban ailad ia baroh ki trai Jylla ba kin lah ban aplai, ban don ia ka rukom thungkam kaba thikna ban jied lyngba ka written examination bad ruh ba baroh ki 28 tylli ki kam ki dei ban long na ka bynta ki trai shnong riewlum ka Jylla bad ka jingiaid lait ia kane ka jingdawa kan ngat ha ka jingpyrshah kaba jur na ka Seng,” u la maham.

Nalor kata u Samla Reuben u la ong ba ka LinkedIn kam dei ka official website jong ka Sorkar Meghalaya ban pynbna ia kino kino ki kam kiba lait bad bynrap ruh ba kino kino ki lad aikam ai jam dei ban pynmih lyngba ki rynsan paidbah lyngba ki official website bad lyngba ki lad pathai khubor.

“Watla ha kane ka bynta ka dei ka ISB kaba la pynmih ia kane ka jingpynbna thungkam ha ka Linkedln, hynrei ka Sorkar kam shym la pynmih ia kino kino ki jingtip ha ki official website kaba la pynlong ia kane ka rukom thungkam kaba sop sop bad ba buhrieh bad kaba ktah bad pynduh lad ia ki trai shnong riewlum ka Jylla bad wanrah ruh ka jingsngewkhia ba ka don ka jingleh shiliang bad ka jingthungkam ia la ki bahaiing hasem ne ki briew kiba don jingiadei,” u la bynrap.

Nalor kata u la ong ruh ba ka ISB ha ka jingpynmih kaba nyngkong ha ka Linkedln ka la pynpaw ba 50% na ki kam ba lait yn thep ia ki briew ki bym dei ki nongshong shnong ka Meghalaya hynrei ia kaba la weng noh hadien.

“Na ka liang ka Seng ka pyrshah jur ia kiba kum kine ki jingleh jong kiba kum kine ki agency ha kaba ki la wanrah ia ki briew ki bym dei ki nongshong shnong ka Meghalaya na ka bynta ban trei ha ka Jylla bad ban knieh noh ia ki lad ioh kam ioh jam jong ki trai shnong riewlum ka Jylla,” ong u nongialam ka KSU.

U la ong ruh ba ka ISB ka la pynbna ha ka Linkedln ba ki briew kiba la thung ha kine ki kam kin trei bad iarap ia ki District Magistrate bad Collector na ka bynta ban pyntreikam ia ki skhim pynroi bapher bapher bad ban shim ia ki sienjam halor ki mat kiba iadei bad ki jingeh hapoh ki district.

“Ka long kaba sngew bynniaw ba ka SorkarJylla kam don shuh ka jingshaniah ha ka jinglah treikam jong ki District Magistrate bad ki Collector ka Jylla wat hadien ba ki la pass ia ki eksam lyngba ka MPSC/ UPSC bad kiwei, ba kin lah ban pyntreikam ia ki skhim pynroi bapher bapher bad ban leh ei ei halor ki jingeh da lade ha ka jaka ban donkam ia ki jingiarap na kum kine ki agency ba kin bthah ia ki halor ki kam jong ki bad ki jingtreikam jong ki,” u la bynrap.

Shuh shuh u la ong ba ka Seng ka la sakhi ruh ia kiba kum kine ki consultancy agency kiba la shlei hapoh Secretariat bad ki ophis ha kylleng ka Jylla. Ka bynta bad ki jingtreikam jong ki ka long kaba artatien bha ha kaba iadei bad ka jingpyrshang jong ki ha ka ban kyntiew ia ka Jylla, u la ong da kaba bynrap, “Ka paw ba kiba bun ki briew na ka Jylla kiba trei bad kum kine ki tnad ki dei kiba don jingiadei bad ki riew sain pyrthei bad kiwei kiwei pat kiba don ha ki kyrdan kiba heh ha ka Jylla. Ha ka jingshisha, lah ban ong ba kum kine ki agency la shna khnang ban shim ïa kum kine ki briew ban trei na ka bynta ka Sorkar.”