Byrthen ka Seng niam Hindu ban khang ia ki surok sha Meghalaya ba pyrshah lehniam ha Krem Mawjymbuin

Syllad | The Rising MeghalayaAugust 7, 2024

Ka Seng niam Hindu ka Kutumba Surakshya Parishad (KSP), napoh Assam, ka la pynpaw pyrshah jur ia ka sorkar Meghalaya halor ka jingkhang ia ki nongleh niam Hindu ba kin leit leh niam hapoh ka Krem Mawjymbuin kaba don ha Mawsynram bad byrthen ruh ban khang ia ki surok sha Meghalaya lada kam weng noh mardor ia kane ka jingkhang pyrshah.

Ka Dorbar Shnong ka Mawsynram ha kine ki sngi ba la dep ka la rai ban khang pyrshah ia ki riewngeit HIndu ba kin wan lehniam hapoh kane ka krem kaba pawnam halor ka jingdon ia ki maw kiba wan dur ha ka rukom kaba ki Hindu ki ngeit ba ka dei ka shap jong ka Shiv ling u Blei Shiva.

“Ngi kwah ia ka jubab na ki bor sorkar ka Meghalaya, lem kumta ka sorkar Meghalaya kan ngat ha ki jingiakhih pyrshah hangne ha Assam, kata lehse da ka jingpakhang ia ka surok sha Meghalaya lyngba ka Jorabat (Guwahati), Paikan (Goalpara) bad kiwei kiwei ki surok,” ong u president ka KSP u Satya Ranjan Borah haba kren sha ki lad pathai khubor ha Guwahati Press Club ha ka 6 tarik mynta u bnai.

U Borah ula ong ruh ba ka Ophis u Myntri Rangbah Duh ka Ri India bad ka Ophis u Secretary General ka United Nation, ki dei ban kylli ia u Myntri Rangbah ka Meghalaya ban pynshai ia ka nongrim jong ka Sorkar Jylla.

“Ngi kyntu ia ka sorkar Meghalaya ba kan weng noh mardor ia kane ka jingkhang pyrshah. Ki dei ban pynkhreh bha ruh na ka bynta kane ka jingleh niam da ki riewngeit HIndu ha katei ka jaka ha ki sngi lehniam jong u bnai Shraban ba kyntang,” ong u Borah.

Nalor kata ula ong ruh “Ka krem Mawjymbuim ka don ia u maw ba wandur kum u Shiv Ling bad ka dei ka jaka mane bad ka Sadhana ki Hindu kiba shong ba sah ha Meghalaya. 

Shuh shuh une u nongialam kane ka seng Hindu ula buh jingkylli ruh da kaba ong “La iohi ba bun bha ki briew kiba dei ki paid Khristan bad katto katne ki Sengbhalang ka Meghalaya ba synshar da ki Missionary Khristan, kila kang pyrshah ia ki riewngeit Hindu ban leit mane Blei ha katei ka jaka. Hato kane ka dei ka kamkai.”

“Ha ka ri synshar paidbah kum ka India, hato phi tharai kane ka dei ban jia, hato ngin lah ban shah ia kiba kum kine ki kam pyrshah ia kine ki jinglehniam kiba katkum ka kolshor? Ka sorkar Meghalaya ka leh aiu hangtei? Hato kim bud ryntih ia ki riti synshar khadar jong ka ri India? Hato u Myntri Rangbah ka Meghalaya, baroh ki nongsynshar ka Jylla bad ki kynhun kiba ia don bynta ki dei kiba la shah pyniaid ha ki missionary Khristan ban shu sngap jar,” u la bynrap.

U Myntri Tourism Bah Paul Lyngdoh u la ong ba ka Mawjymbuin kaba don ha ka shnong Mawsynram kaba la khring ia kiba bun ki nongwan jngoh kai na  ki jingngeit bapher. Ula ong ban pynkylla ia katei ka jaka jngohkai pyrthei sha ka jaka leh niam kan ktah iaka jingwan ki nongjngoh ne tourist.

Ka ri india ka dei kaba laitluid haka jingngeit niam bad lada pynshlur ban pynlylla iaki jaka jngohkai sha ki jaka mane blei kan nym don jingmut.

U bah Paul u la iaroh ia ki sienjam ba la shim da ka Dorbar Shnong Mawsynram ban khanglad ia ka jingpynkylla jaka mane ia katei ka jaka jngoh kai pyrthei. U la ong ruh ba ym pat don ba ai da ka jingthoh na kaliang ka dorbar shnong ban dawa iaka sorkar ban tuklar halor kane ka bynta.