Byrthen khang surok biang ka JAC, maham iaki trok kit palat pud ha surok bah NH 6
Ka Joint Action Committee Namchiang Narpuh (Tongseng -Ratacherra), East Jaintia Hills, ka pynpaw ia ka jingsngewkhia kaba jur halor ka jingleh kuman ka sorkar lyngba ka NHAI ban maramot ia u surok NH-6 kumba la kular. Ka jingbym leh ei ei jong ka sorkar ban pynbha ia u surok ha kata ka rukom, ka la pynjynjar ia ki nongleit nongwan namar ka jingsniew palat u surok sha ba palat pud.
U Chairman JAC, Ma Lasting Pala ula ong ba kaba thamula ka long ba ka Sorkar/NHAI ka siang rong (blacktopping), ha ki bynta jong u surok ba dang bha bad ieh pat ia ki krem ki kroh ha shilynter u surok. Kane ka jingleh kane ka Company ka long tang ban ioh ban pyllait (draw) bill bad ka long kumba tep eit miaw.
![](https://www.syllad.com/wp-content/uploads/2024/09/JIT-Vacancy-823x1024.avif)
Bunsien ki nongleit nongwan khamtam kiba pang ba shitom ki sah kut haka dheng kali ha thain Tongseng shaduh Umkiang, Ratacherra khamtam ha ki bynta ka Mandir da ki bun bun kynta namar ka jingbym lah iaid shuh ki kali kum ka kali kit mawshun kit dewiong kiba kit palat pud (overloaded) bad dei kine shi bynta ka jingsahkut kali (traffic jam) ha shi lynter u surok NH-6, ula ong.
Ka JAC ka maham ruh ia ki truck Dewiong/Mawshun ba kim dei ban pynkhein ia ka hukum jong ka Supreme Court da kaba kit palat pud (overloaded) nangne shakhmat. Bad lada ka JAC ka dang lap ia kiba kit palat pud (overloaded) kan shim ia ka sien jam da kaba mih paitbah ban kem naphang ia ki truck Dewiong/Mawshun kiba pynkhein ain bad aiti syndon ia ki sha ka bor jong ka ain lane ban ai da ka FIR.
Ka JAC ka kyntu ia ka sorkar/NHAI ban maramot noh ia u surok NH-6 hapoh shitaiew. bad lada kam lah ka JAC kan lum paitbah biang ha surok ban pakhang syndon ia u surok.
![](https://www.syllad.com/wp-content/uploads/2024/05/iron-Rod-jpg.webp)
![](https://www.syllad.com/wp-content/uploads/2024/05/NH-6.jpg)
![](https://www.syllad.com/wp-content/uploads/2024/05/portholes.jpg)
![](https://www.syllad.com/wp-content/uploads/2024/05/Overloaded-trucks-jpg.webp)
Leave a Reply