Byrthen khangdam ka HNLC ia ki Temple Hindu lada iakhih ka KSP ban dawa lehniam ha krem Mawjymbuin

Syllad | The Rising MeghalayaDecember 24, 2024

Ka seng Hynniewtrep National Liberation Council (HNLC) ka la byrthen ban khang dam syndon ia baroh ki temple jong ki Hindu lada ka kynhun shit niam Hindu ka Katumba Surakshya Parishad (KSP) ka nud ban pakhang ia ka surok na ka bynta ban dawa plie ia ka krem Mawjymbuin na ka bynta ka jingleh niam ki riewngeit Hindu.

Ka HNLC ha u kyrwoh lyngba u Bah Saińkupar Nongtraw General Secretary cum Publicity Secretary ka pynrem jur ia ki jingkren pynshit bad ki jingbyrngem byrsit kiba la pynmih da kane ka seng KSP halor ka jingkhang ban pynlong ia ki jingmane Blei Hindu ha krem ​​Mawjymbuin kaba don ha ki jaka jong u Hynñiewtrep. U la ong ba kane ka jingwan rung khlem nongrim ha ki jaka kyntang jong ngi ka dei ka jingthombor beit beit ia ka jinglong trai ri, ka kolshor, bad ka hok jong ngi kum ki trai ri trai muluk.

“Ki jaidbynriew Hynñiewtrep ki la long ki nongsumar ia ka Krem Mawjymbuin da ki pateng bynriew, kata slem bah shuwa ba kino kino ki briew kiba na bar kin dawa ia ka kum ka jaka leh niam jong ki. Ka Dorbar Shnong Mawsynram, kaba trei katkum ka ain riti Khasi tynrai, ka la pyndonkam hok ia la ka iktiar ban iada ia ka jinglong kyntang jong kane ka jaka. To ai ba kan long kaba shai: ym don kano kano ka bor ba na bar la ka long ha ka sain pyrthei ne ha ka niam kaba don hok ban bthah kumno ngin pyniaid ia ki jaka kyntang jong ngi,” u la ong.

“Ki jingkynnoh bad jingbyrngem ba triem jong ka KSP ban khang surok kim dei kiei kiei hynrei ka jingbteng ia ka jingmut jingpyrkhat jong ki nongsynshar phareng kaba wad ban synshar, ban pyndonkam bakla, bad ban pyndam noh ia ki kolshor trai ri trai muluk. Ka jingshlur jong ki ban ia nujor ia ka Krem Mawjymbuin bad ki jaka leit leh niam jong ki Hindu kum ka Kamakhya Temple bad ka Tirupati Balaji ka dei ka jingthmu ban knieh ia ka spah ba kyntang jong ka jaidbynriew Hynñiewtrep,” bynrap u Bah Sainkupar.

Une u nongialam ka HNLC u la ong, “Ngi kyntait jur ia kino kino ki jingpyrshang ban pynkylla ia ki jaka kyntang jong ngi sha ki mar jngohkai pyrthei ne ki tiar ban pynphriang niam. Ka krem ​​Mawjymbuin kam dei ka jaka mane blei jong ki Hindu— ka dei ka bynta jong ka kolshor jong ka jaitbynriew Hynniewtrep.”

Ki jaidbynriew trai ri ha kylleng ka pyrthei ki don ka hok kaba hiar pateng ban iada ia ki jaka kyntang jong ki bad ban pynneh pynsah ia ki rukom lehniam jong ki khlem da shah pynthut ha ki bor kiba nabar. Ia kane ka nongrim la pynskhem da ka jingpynbna jong ka United Nations halor ki hok jong ki trai ri trai muluk (UNDRIP), ia kaba ka India ka la kyrshan bad ka don ka jingkitkhlieh ban burom.

Katba ki don ki nongwan jngohkai kiba batai ia ka jingwandur jong u maw ba la pynlong da ka mariang ha katei ka krem ​​kum kaba iadei dur bad u Shiva Ling, ym don kano kano ka sakhi histori ne ki jingwad bniah ban kyrshan ia ki jingong ba kane ka krem ​​ka la long ka jaka mane kyrpang jong ki Hindu la bun spah snem. Kum kine ki jingpynskhem kim lah bad kim dei ban pynduh ia ka hok jong ka jaidbynriew Hynniewtrep, kaba la long ki nongsumar hok ia kane ka ri kyntang ha ki pateng bynriew.

“Ki jingkynnoh bym don nongrim jong ka KSP halor ka jingiasylla ki missionary Khristan bad ki kam pyrshah Hindu ki dei ki jingkren pynshit ki ba la thmu ban pynmih ia ka jingialeh pyrshah ha ka imlang sahlang. Ka jaidbynriew Hynñiewtrep ka ju pynneh pynsah ia ki jinglong jong ka burom, ka jingia im ryngkat lang, bad ka shongsuk shongsaiñ. Hynrei ngin ym shah ia ki jinglamler bad ki jingpynbna kiba thmu ban pynlong ksuid ia ka imlang sahlang jong ngi bad ban pynduhjait ia ki rukom synshar tynrai jong ngi,” ong u nongialam ka HNLC.

Ka sorkar India ka dei ban leh eiei mardor pyrshah ia ka KSP halor ki jingkren pynpait pynpra bad pynkhihwin jong ka. Ia ka hok kolshor jong ka jaidbynriew Hynniewtrep la iada hapoh ka Sixth Schedule jong ka Riti Synshar ka Ri India, khamtam eh hapoh ka Paragraph 3 bad 4, kiba ai bor ia ki Autonomous District Council ban thaw ia ki ain halor ki riti imlang sahlang, ki rukom leh kolshor, bad ka jingpyniaid ia ki khyndew ki shyiap bad ki khlaw ki btap na ka bynta ka jingmyntoi  jong ka jaitbynriew riewlum.

Shuh shuh u la ong ba lada ka  KSP ka pyrshang ban pynmeh ding ia ki jingeh hapdeng ki jaidbynriew, kin sa sakhi ia ka bor ba pura jong ka jingkut jingmut jong ngi. Ai ba kan long kaba shailada ki tempi jong ki ki dang plie, ngin pynthikna ba kin sa kylla long ki jingjot. Lada ki kwah ban pynkhihwin, kin sa iohi kumno ka jingpynshitom kaba shisha ka long. To ngin tip ba ka jaidbynriew Hynñiewtrep kan ym shah jem ha ki briew kiba nabar kiba pyrshang ban banbor bad pyniaid halor ka khyndew ka shyiap jong ngi.