Byrthen mih paidbah ki sengbhalang bad shnong lada plie iaka khaii pateng bad ka Bangladesh

Syllad | The Rising MeghalayaJuly 9, 2020

Ki sengbhalang ba kynthup iaka Khasi Students’ Union (KSU) War Jaintia Circle bad ka Hynniewtrep National Youth Front (HNYF) Southern Riwar Circle bad ki nongialam shnong kila mih paidbah sha Tamabil, Dawki ban pyrshah iaka jingthmu plie iaka kad Khaii ha LCS Dawki Tamabil mynta ka sngi.

U District Magistrate jong ka West Jaintia Hills District ula pynmih iaka hukum ban plie noh ia kane ka kad khaii mynta ka sngi 9 tarik Naitung, hynrei ki sengbhalang bad nongialam shnong Dawki, Darrang, Shnongpdeng, Amshipai, Amkoi, Lymba, Ryngkum, Khonglah, Lamin bad kiwei kiwei kila dawa ban pyndam shuwa iaka jingkhaii lyngba kane ka kad khaii namar ka khlam COVID-19.

Ka jingialang kaba long hynnin ka sngi kaba iadonlang ki Dolloi bad ki nongialam shnong bad ki sengbhalang da kawei ka sur kila dawa ban pyndam shuwa iaka jingiakhaii pateng bad ka Bangladesh lyngba katei ka kad khaii.

Kumta ban pynpaw iaka jingpyrshah ka KSU, HNYF bad ki nongialam shnong kila mih paidbah ha ka khyrdop ka kad khaii pateng jong ka LCS Tamabil, Dawki ban pynpaw iaka jinghpyrshah. Nalor ka KSU bad HNYF ka FKJGP bad ka HYC ruh kila mih ban kyrshan ia kane ka jingiakhih ban pyndam iaka khaii pateng bad ka ri Bangladesh.

U Magistor jong ka Amlarem Civil SubDivision u ma Jonathan Shylla ula hiar sha ka taei ka jaka ban iakren bad ki sengbhalang bad ki nongialam shnong.

Ki sengbhalang bad ki nongialam shnong ka War Jaintia kila dawa da kawei ka sur ba u Deputy Commissioner ka District u dei ban khot jingialang ban iatai sani bha halor kane ka jingplie iaka khaii pateng bad ka Bangladesh.

Kii nongialam shnong bad ki sengbhalang kila byrthen ba lada ka sorkar bad ka bor district ka leh bymsuidniew iaka jingdawa jong ki, kin mih paidbah ban pyrshah wat la ki hap ban pynkhein iaka kyndon ain ban pynbor iaka sorkar ban pynsangeh shuwa iaka jingkhaii bad ka Bangladesh.