Byrthen pynlong jingiakhih sa ki nonghikai upper primary ha Jylla, 3 tarik ka jingialang bah ha Tura

Syllad | The Rising MeghalayaNovember 24, 2021

Hadien ka jingiakhih dawa tulop ki nonghikai SSA, sa ka Synjuk ki nonghikai hapoh ka lama jong ka Meghalaya Upper Primary school Teachers Association (MUPSTA) Garo Hills Region kan pynlong iaka Mass Teachers meeting haka 3 tarik Nohprah ha Asanang, Tura, West Garo Hills.

Kane ka jingialang ka long na ka bynta ban pan iaka rai jong baroh ki nonghikai upper primary skul ban pynlong syndon da ka jingiakhih paidbah kaba tyngeh tad haduh ba ka sorkar kan pynurlong noh ia ki jingdawa jong MUPSTA. Ka jingdawa kalong ban kyntiew deficit noh ia baroh 844 tylli ki adhoc upper primary skul kiba don ha Meghalaya, ong u kyrwoh bala phah SR Marak, Vice President MUPSTA-Central Body uba long ruh President MUPSTA Garo Hills Region.

Ka synjuk kala pynpaw iaka jingsngewdiaw shikatdei eh ia ka jingkuman bad leh kyllain jong ka sorkar Meghalaya ia ki jingdawa jong ka seng ban kyntiew deficit pura noh ia baroh ki UP skul. Ha ka jingshisha, u CM ba donburom jong ka sorkar Meghalaya u Conrad K Sangma u la kular ban kyntiew deficit noh ia baroh ki adhoc UP skul ha Meghalaya ha ka Teachers’ Conference kaba la long ha Asanang Tura West Garo hills ha ka 27th Aug. 2018. Phewse baroh kine ki jingkular ki khlem ler kam satia haduh mynta. Katkum ba paw na ki dak ki shin ngi iohi ba ka sorkar ka ialeh ban kiar ia ki nongialam jong ka seng haduh ba wat tang ban ia kynduh ia u CM ruh u khlem ai por satia.

Ka MUPSTA kala ong ba haka jingiakynduh ia u Commissioner Finance ha Secretariat ha ka 17th Naiwieng 2021 ban twad jingmut ha ka jingiadei bad ki jingdawa jong ka, kala kynnoh ba ka jubab ba u la ai ka long ka bym sngewtynnad satia ha kaba u la ong lada un approve ne sign lut ia baroh ki proposal kiba wan sha ka miej jong u, ka sorkar Meghalaya kan sa kitram kitshah ne bankrupt.