Byrthen pynsangeh ka JSM iaka jinglum pisa ka Toll Gate ha Lumshnong ba sniew tasam ka surok bah NH-6

Syllad | The Rising MeghalayaSeptember 3, 2021

Ka Jaintia Students’ Movement (JSM), Eastern Region kala ujor sha u Deputy Commissioner, East Jaintia HIlls District halor ka jingsniew palat ka surok bah NH 6 naduh na Tuber Shohshrieh haduh Malidor.

Katkum ka jingujor ka JSM kala ong ba kam lah shuh ban niew ïaki thliew ki syar kiba paw ha shilynter kane ka surok bad bunsien kala wanrah iaka jingjia aksident namar ba sniew ka surok ha baroh shilynter ka surok naduh na Tuber Shohshrieh haduh Malidor.

Ka JSM kala ong ruh ba la sakhi baka surok bah kam don iaki nala kiba paka bad ka um ha ka aiom slap kala tuid sha surok kaba la wanrah iaka jingsma iwtung na ki jakhlia ba mih na ki nala ha Wapungskur, Ladrymbai bad kiwei kiwei ki shnong.

Ka JSM kala kyntu ia u DC ban shimkhia ban tuklar ia kane ka kam katba lah kloi bad kala byrthen lada ym lah ban maramot ne shna iaka surok, ka JSM kan khang ne pynsangeh iaka jinglum pisa ka NHAI ha Toll Gate ha Lumshnong.

Ia kane dorkhat kaba la soi da u president JSM Wellsong RD Siangshai bad u general secretary JSM u Suni Bareh la ai ruh sha u manager ka NHAI.