Byrthen pynshitom ka JHADC iaki benami & ki bar jylla bym biang license

Syllad | The Rising MeghalayaJune 24, 2020

Ka Jaiñtia Hills Autonomous District Council (JHADC) kala byrthen ban leh da kaba tyngeh bad ban pynshitom ïa kiba leh benami bad ki bar jylla kiba khaii pateng bad trei bylla khlem ki kot ki sla kiba biang hapoh u pud ang ka konsil

Ïa kane ka rai la shim haka jingïalang kaba la khot pynlong da u executive member dei khmih ïaka tnad Taxation bad ka Trading by Non-Tribal, u Winning G Sungoh bad ki nongïalam shnong ka Jowai haka sngi ba Ar.

U EM Incharge Taxation ula khot ia kane ka jingialang hadien ba ula lap ba ka khajna jong ka konsil ka lait rud shabar ka pla ka konsil na ki trading license, ka Non-Tribal Employee Service License, professional tax kumjuh ia ki briew kiba leh benami ne ban pynshah kyrteng haka khaii ka pateng ha baroh ar tylli ki district ka East bad West Jaiñtia Hills .

Ula ong ba da ka jingiatreilang ki ki waheh shnong kiba long ki briew kiba hajan tam jong ka konsil ki lah ban ïarap ïaka konsil ban lap iaki briew kiba leh benami bad iaki bar jylla kiba pyniaid iaki khaii ka pateng bad trei bylla beaiñ khlem kot khlem sla.

Ia mynta ka konsil kala ai por haduh 30 tarik Jylliew ban pynthymmai iaki trading license namar ka jingkhang khyrdep ne lockdown ban iakhun iaka khlam COVID-19.

“Ki Waheh Shnong ki don ka bor ban jurip bad ban pynthikna ïaki bar jylla kiba khaii bad trei ktah hapoh kano kano ka shnong ba kilah ruh ban jurip ïaki kot ki sla ki bar jylla naduh kla trading license, ka Non Tribal Employee Service License bad kiba ym siew professional tax sha ka konsil bad ban pyntip ruh lada don ki ba leh benami,” la ong u ma Winning Sungoh

“Ngi donkam ka jingïatreilang ki waheh shnong namar ka tnad Taxation ka duna nongtrei ban leit khynra ha manla ki dukan, kharkhana bad ki jaka iew ne ki jaka khaii pateng. Lada lap ïa kino kino ki bar jylla kiba ym biang ki kot ki sla ki waheh shnong ki lah ban pyntip sha ka konsil bad  ngin  pynshitom ïaki ba leh beaiñ,” ong u EM ka tnad Taxation ma Winning Sungoh

Ki waheh shnong jong ka sor Jowai kiba don ha katei ka jingialang ki kynthup ïa u ma Edystone Shylla waheh shnong Iawmusiang, LD Lakiang waheh shnong Ladthadlaboh, u Ma Pyrkhat Shylla Waheh Shnong Mookyrdup, u Albert T Gatphoh waheh shnong Caroline Colony, RW Sdor  waheh shnong Loomsooiung Newhill bad kiwei kiwei.

Ki Waheh Shnong kila pynpaw ba ki kloi bad ai ka jingiatreilang bad ka konsil, hynrei bunsien ka dei ka konsil kaba leh klet ïaki waheh shnong kaba wanrah ïaka jingjyllei ki kam khaii beain bad ki bar jylla kiba trei khlem kot sla ha Rilum Jaintia baroh kawei.