Byrthen shah thngan khlem pud ki nongniah trok ka karkhana pynmih dewbilat

Syllad | The Rising MeghalayaJanuary 15, 2025

Ki nongniah trok kiba don bynta haka kit ka bah iaki mar ba pynmih kawei ka karkhana dewbilat Star Cement kila byrthen ban pynlong da ka jingiakhih shah thngan kaba khlem buh por ka ban sdang haka 16 tarik Kyllalyngkot ha Lumshnong.

Ka daw ka jingshah thngan ka long halor ka jingleh kuman ki nongpyniaid jong ka Transport (NECPL) Star Cement da kaba shu leh mynleh ban ai bhah ban kit ban bah sha jngai bad jied ruh ia ki katto katne ki driver kum ban pynshitom iaki nongniah kali ba kin iehnoh kam naka karkhana bad ban ioh lad pat ban thep bujli da kiwei, la pynpaw u T Sumer, general secretary Driver Truck Star Cement Association.

Kine ki nongniah trok, kila ong ba haki por mynshwa ka karkhana kam ju leh kumne bad lada ka phah trip sha jngai ruh ka shait phah solonsar ym da kaba shu jied tang iaki katto katne ki driver, ong une nongialam.

Kane ka synjuk kala ong ruh ba ka bai umphniang, ka bai lynti ka bai bam kam biang bad dei halor kane ka nongrim kim banse ban shim da kane ka sien jam ban shah thngan ha phylla jong katei ka karkhana khnang ba kin ioh niang iaka kam bad iaka hok kum ki nongniah kali jong ka karkhana.