Byrthen u Nehemayah Tyngkan ban kiew ïinglieh ïingsaw ban dawa kyntiew kyrdan sub division iaka Laskein Block

Syllad | The Rising MeghalayaFebruary 11, 2022

U Nehemayah Tyngkan ula byrthen ban kiew ïing lieh ïing saw ban kyntiew kyrdan Sub-Division iaka Laksein C&RD Block kaba dei block kaba rim tam ha West Jaintia Jaintia Hills District.

Ia kane ula ong haba kren bad ki lad pathai khubor haka sngi Thohdieng ha Infinity conference hall, Mooralong Ladathadlaboh, Jowai haba pynbna paidbah iaka jingthmu jong u ba un iakhun biang iaka election MLA ha u snem 2023 na 4-Mowkaiaw Constituency.

Shuh shuh haba kren ula ong ba ka Laskein block kaba la thaw naduh 1972 ka don ka jingbun briew kaba haduh 115715 ngut (katkum ka jingkhein kaba lum hapoh block ha snem 2022) bad ka don ar tylli ki constituency ka Mowakiaw bad Raliang, hyrnei ka dei ka Block kaba shah iehbein bad sahdien ha baroh ki liang. Tang ka Mowkaiaw Constituency ka don 9560 ïing kane ka thain bad ka jingbun briew 78423.

“Ka Laskein Block kadei hok ban shah kyntiew kyrdan noh sha ka Sub-Division, hynrei kaba sngewsih kalong kane ka block kala shah iehbein haka sorkar bad kamdon wat tang kawei ka skul sorkar haka kyrdan secondary, kumjuh ruh kam don iaki jaka sumar kiba paka bad ki jaka pyniaid iew iaki mar rep kiba kynthup ia u sying, shynrai, synsar bad kiwei kiwei kiba kane ka thain ka khlain ban pynmih bad kam don ruh iaki cold storage bad ki godown wat la kadei ka block ka rim tam,” la ong u Nehemayah bad bynrap “lada u wan haka bor un dawa ban kyntiew kyrdan sub division iaka Laskein Block bad lada donkam ban kiew ïinglieh iingsaw ruh un kiew ban pynioh iaka jingangnud u paidbah”

Ula ong ruh ba ki jaka sumar ki don hynrei ym shym la pynbiang iaki jingdonkam naduh ki dawai dashin bad ki doctor kaba buh jingeh ia u paidbah na kylleng ki shnong ban ioh jingsumer sukher kaba biang.

Shuh shuh ula ong haba iadei bad ka jaka jngohkai pyrthei kane ka thain ka don ar tylli ki jaka jngohkai kiba khring bha ia u paidbah kiba kynthup iaka Lumtiniang ha Mowtyrshiah bad Iooksi, pynban haduh mynta ym shym la wanrah iaki skim pynroi ban kyntiew iaka kam jngohkai ha kane ka thain kaba dei kawei ka lad ban pynim jakpoh ia paidbah ka thain.

Haba iadei bad ka election MLA ula kyrpad iaki paidbah naduh ki samla haduh ki rangbah bad ki longkmie longkpa ban kyrshan ia u khnang ba un poi sha ka thong ban ioh shakri iaka thain bad wanrah iaka roi ka par.

Ula ong ruh ba haka sien kaba iakhun nyngkong u ieng na party Congress bad mynta ruh u dang don hi bad ka Congress.

Haba kylli na kaei ka party un iakhun ha kane ka kynti, ka jubab u Nehemayah Tyngkan ka long ia mynta um pat rai hynrei u dang don hi bad ka Congress.