Byrthen ujor ejahar u MDC Tura halor ka kam bamsap ki supplier NREGA

Syllad | The Rising MeghalayaJuly 7, 2024

U MDC ka BJP na Tura u Bernard N Marak u la byrthen ban ujor da ka ejahar pyrshah ia ki supplier bad ki nongdie tiar ka NREGA kiba ju pynpoi ia ki tiar ki tar halor ka jingkynnoh ba ki ju khate haduh 50-60% na ka pisa ba thmu ban pynbiang ia ki mar.

Lyngba u kyrwoh ba la pyllait haka 7 tarik Naitung, u Marak u la ong, “Ki supplier bad nongdie tiar ka NREGA kiba ju pynpoi ia ki tiar ki tar ki ju khate haduh 50% ka pisa na ki tiar ba thmu ban pynbiang ia ki tiar na ka bynta ki jingpyntrei hapoh ki shnong ki thaw, bad kane ka dei kaba la jia ha kiba bun ki C&RD Block ha Rilum Garo.

“Katto katne na kine ki supplier ki la pynpaw ba ki hap ban ot ia ka pisa namar kin hap ban siew sha ki nongialam sain pyrthei bad sha ki katto katne ki ophisar sorkar na ka pisa ba la mang. Dei na kane ka daw ba bun ki shnong kim lah satia ban pyndep ia ki jingtrei ha ka por kaba biang,” u la kynnoh.

Da kaba kyntu ia ki nongshong shnong ban pyntip ia kiba kum kine ki jingjia, u Marak u la ong, “Nga kyntu jur ia ki nongshong shnong kiba la ngat ha ka jingshah ot kaba 50 haduh 60 % da ki supplier bad ki nongdie tiar ba kin aijingtip mardor sha ka ophis jong Nga bad ngin ujor da ka ejahar pyrshah ia kito kiba khniot bein ia ki nongshong shnong. Ngin pyntip sha ka ophis u Myntri Rangbah ka Jylla bad ka ophis ki Deputy Commissioner halor kine ki kam bamsap.