Byrthen ujor u Dr Mukul sha u PM ba kynnoh pyndonkam ka NPP da ka pisa beain na u drok bad dewiong

Syllad | The Rising MeghalayaAugust 31, 2024

U Nongialam ka Liang pyrshah uba dei ruh u Myntri Rangbah barim ka Jylla u Dr Mukul Sangma haka 30 tarik Nailar u la byrthen ban thoh sha u Myntri Rangbahduh ka Ri u Narendra Modi ban dawa leh ei ei halor ka jingkynnoh ba ka Seng National People’s Party (NPP) kaba ialam ia ka sorkar ka la pyndonkam da ka pisa beain lyngba u drok bad dewiong.

Kane ka la wan long shi sngi hadien ba u Symbud Myntri Rangbah ka Jylla uba dei ruh u State President ka NPP u Bah Prestone Tynsong u la kob ia ka liang pyrshah TMC ba kan ujor da ka ehajar halor ka jingkynnoh jong ka Congress ba ka NPP ka la pyndonkam da ka pisa beain ban behthong ban thied ia ki MLA na kiwei pat ki seng sain pyrthei.

Lah ban kdew ba ha ka 16 tarik Nailar, u president ka MPCC u Bah Vincent H Pala u la kynnoh ia ka NPP halor ka jingpyndonkam da ka pisa beain ba la ioh lum lyngba u drok, jingtih dewiong bad ki kam kontrak na ka bynta ban pynkut noh ia kiwei pat ki seng sain pyrthei.

Haba kynthoh ia ka jingkren jong u Bah Prestone halor ka jingdawa jng ka TMC ban pynlong jingtohkit halor kane ka phang, u Mukl u la ong ba u la leh ia ka kam kaba dei ban leh da kaba kyntu ia baroh ki ar party (NPP bad Congress) ba kin kitkhlieh namar ka dei ka jingkynnoh kaba khia shibun.

“Hynrei, lada kim don jingkitkhlieh, nga hap ban thoh sha u Myntri Rangbahduh ba kine ki dei ki jingkynnoh bad ruh ban shimkhia bad leh ei ei halor kane,” ong u Dr Mukul da kaba bynrap.

U Mukul u la kdew ba ki don laitylli ki jingkynnoh ba la kynnoh da ka Congress pyrshah ia ka NPP.  “Kawei ka long halor ka pisa beain ia kaba la kynnoh ka dei kaba wan lyngba u drok, kawei pa ka pisa kaba wan na ka jingtih dewiong beain bad kawei pat ka jingleh thok halor ki kam kontrak.”

Da kaba pynpaw ba kane ka mat ka dei hapdeng ka Congress bad ka NPP ym ka TMC, une u nongialam Liang Pyrshah u la ong, “Nga la kylli ia ki la ki don ne em ki jingkynnoh, ki hap ban pynshisha ba ki jingkynnoh ki long kiba bakla, hato u (Prestone) um sngewthuh ia kaei kaba nga mut. Kin hap ban pynshisha ba kane ka jingkynnoh kaba wan na u president ka MPCC bad MP barim u Bah Pala ka dei kaba bakla. Kin hap ban pynshisha ia kata lane ki hap ban aireng pyrshah ia u bad ban pynshisha da lade ba kim long kumta.”

Haba pynpaw halor ka jingdonkam jong ka Sorkar Pdeng ban shimkhia halor kane ka jingkynnoh, u Mukul u la ong, “Namar ba ka mat kaba iadei bad ka kam tih dewiong beain kam dei ka sobjek jong ka Jylla, kumta ka Sorkar India ruh ka dei ban shimkhia. Kano kano ka jingpynkhein ain hapoh ka kyndon 21 jong ka MMDR Act, 1957 ka dei ka kam bymman. Kumta ka jingleh kam bymman ka dei hi ka kam bymman kaba lah ban tip. Mano ban leh katkum kane ka jingbthah jong ka ain bad ban long kiba hok ha ka jingkitkhlieh jong ki ha kaba iadei bad ka jingpyntreikam ia ka ain. Kumta kine kiei kiei kim dei ki ban shu shim tang kum ki jingkren lait jynjar kaba mih tang namar ki daw sain pyrthei, em ngi shimkhia halor kane.”

“Kumjuh ruh lada phi kren shaphang ki jingkynnoh ba ka pisa ka wan na ki nongkhaïi drok beaiñ, te phi la dei ban husiar bha, phi long sakhi ïa ka jingbun ki khubor ba la rah da ki lad pathai khubor halor ki jingiohkurup ïa u drok uba bun bha ha kylleng kylleng ka North East, kaba ka dor kalong ha ki jingkhein kiba heh, ym tang 1-2 klur, 5 lak ne 10 lak, ka long 100-400 klur, kata ka mut ka jingiasylla kaba heh ban pyniaid ia kane ka kam, kane ka kam runar kam dei tang ha NE, kumta ka sorkar India ka hap ban shimkhia ïa kane ka jingkynnoh,” u la bynrap.

Katkum ka jingong ka jong u, “Kam lah ban long tang ki jingkynnoh bad nangta uta uba wan ryngkat ki jingkynnoh u sngap jar. Lada u wanrah ia ka jingkynnoh ma u ruh u dei ban iaid shakhmat.”